«Qulager» ádebı baıqaýy jarııalandy
ALMATY. KAZINFORM – V Dúnıejúzilik kóshpendiler oıyndary qarsańynda Ulttyq sport qaýymdastyǵy jáne Qazaqstan Jazýshylar odaǵy birlese otyryp qalamgerler arasynda «Qulager» respýblıkalyq ádebı baıqaýyn jarııalady.
Respýblıkalyq saıys poezııa, proza, balalarǵa arnalǵan shyǵarma, komıks, drama, derekti proza, fantastıkalyq nemese mıfologııalyq shyǵarma atalymdary boıynsha ótedi. Qatysýshylar ulttyq sport túrlerin basty taqyryp etýi kerek. Oǵan kez kelgen qalamger qatysa alady. Alaıda buryn-sońdy jarııalanbaǵan eńbekterin ǵana usynýy tıis. Ótinim 22 maýsymǵa deıin qabyldanady. Ár nomınatsııanyń bas júldesi – 2 mıllıon teńge.
Baıqaýdyń negizgi maqsaty – ulttyq sportty nasıhattaý jáne qalamgerlerge qoldaý kórsetý, olardy ulttyq sport túrleri týraly jańa týyndylardy jazýǵa yntalandyrý.
Qazaqstan Jazýshylar odaǵy basqarma tóraǵasy Mereke Qulkenov kórkem ádebıette ulttyq múddege saı keletin týyndylardyń úlesin arttyrý qajet ekenin atap ótti.
«Ónerdiń ishindegi eń bir qasterlisi – kórkem ádebıet. Sondyqtan shyǵarmashylyq zııaly qaýym, jazýshy qaýym ókilderi úshin «Qulager» ádebı baıqaýynyń mańyzy zor. Óskeleń urpaqtyń kitap oqýǵa degen qyzyǵýshylyǵyn oıatýǵa bar kúsh-jigerimizdi salamyz», - dedi Mereke Qulkenov.
Ulttyq sport qaýymdastyǵynyń prezıdenti Islambek Saljanov respýblıkalyq ádebı baıqaýdyń mańyzyna toqtaldy.
«Memleket basshysy Qasym-Jomart Kemeluly Toqaev ulttyq ıdeologııa men jańa qoǵamdyq etıkany qalyptastyrýǵa bas nazar aýdarǵany belgili. Bul rette bıyl ótetin 5-shi Dúnıejúzilik kóshpendiler oıyndary qarsańynda qalamgerler arasynda «Qulager» respýblıkalyq baıqaýynyń jarııalanýy qýanyshty jańalyq. Árıne, baıqaý ataýy kezdeısoq tańdalmaǵany belgili. Óıtkeni Іlııas Jansúgirovtiń «Qulageri» – eshqashan eskirmeıtin, máńgi jas poezııa. Qazaq ádebıetine jańa esimder men tyń týyndylar qosylyp, ulttyq ádebıetimizdi baıyta túsedi degen senimdemin», - dedi Islambek Saljanov.
