Qulaǵan zymyran bólshekterinen zardap shegýshige plastıkalyq otalar jasalady
QARAǴANDY. QazAqparat - Qaraǵandy oblysy jazyǵyndaǵy «Soıýz-2.1a» zymyran tasyǵyshy bólshekteriniń qulaýy saldarynan kúıip qalǵan kásiporyn jumysshysyna birneshe plastıkalyq ota jasalmaq, dep habarlaıdy «QazAqparat» HAA tilshisi.
«Mashına jasaý ǴÓB» resseılik kásiporny zardap shekken azamattyń emine qajetti qarajatty óz moınyna aldy.
«Naýqastyń jaǵdaıy ázirge aýyr bolǵandyqtan, terini aýystyryp ota jasaý keıinge qaldyrylyp otyr. Ol esin jıdy, ózdiginen demalady, alaıda denesin qatty kúıik shalǵan», - dedi Qaraǵandy oblysy densaýlyq saqtaý departamentiniń baspasóz hatshysy Aıjan Isa.
Maqajanov atyndaǵy ortopedııa jáne travmotologııa ortalyǵy dırektorynyń orynbasary Serik Tóleýbaevtyń aıtýynsha, 49 jastaǵy emdelýshige tek narkozben ǵana tańý protsedýralary júrgiziledi.
«Tańýdy kúıgen jerlerdiń aýmaǵy men tereńdigin anyqtaý úshin narkoz arqyly jasaımyz. Onyń denesiniń 40 paıyzy kúıgen jáne kúıik alǵan oryndar ýly zattarmen zaqymdalǵan», - dep atap ótti S. Tóleýbaev.
