Qulaǵan turǵyn úıdiń ornyna 31 jer úı salynady - Qyzylorda oblysynyń ákimi
QYZYLORDA. QazAqparat - Búgin oblys ákimi Qyrymbek Kósherbaev Aral qalasyndaǵy qulaǵan turǵyn úıge arnaıy baryp, turǵyndarmen júzdesti. Bul týraly oblys ákiminiń baspasóz jetekshisi Saltanat Shahanova aıtty, dep habarlady QazAqparat tilshisi.
Kezdesýde oblys ákimi oblystyq bıýdjetten qarjy bólinip, aldaǵy 4-5 aı kóleminde 31 jer úı salynatynyn jetkizdi. Osy jańa qonystan qulaǵan úıde zańdy tirkeýde turǵan 16 otbasyna baspana berilmek. Munan basqa Aral qalasynda tozyǵy jetken 8 úıdiń turǵyndary da jańa salynatyn úılerge qonystanatyn boldy. Qalǵandaryn ákimdikte kezekte turǵan turǵyndar ıelenedi.
Turǵyndar aımaq basshysynyń apatty jaǵdaıdy birden sheshýge jasaǵan batyl qadamyna rızashylyqtaryn bildirdi. «Bizder másele bulaı tez sheshimin tabady, dep oılaǵan joqpyz. Bul da bolsa oblysymyzdyń ekonomıkasy qaryshtap damyp kele jatqanynyń belgisi dep oılaımyn. Qıyn sátti jurtymen birge bola bilgen oblys ákimine alǵysymyz sheksiz»,-dedi turǵyndar atynan Orazgúl Lashynova.
Óńir basshysy az qamtylǵan otbasylarynyń árbirinen bir adamnan jumysqa ornalastyrý jóninde aýdan ákimine tapsyrma berdi.
Qazirgi kúni jataqhananyń 15 otbasy arnaıy qabyldaý ortalyqtarynda turyp jatyr. Olarǵa ýaqtyly ystyq tamaq berilse, oqýshylar úshin arnaıy avtobýs bólingen.
