Qulaǵan tikushaqtyń qara jáshigi saraptamaǵa jiberiledi
ALMATY. QazAqparat - Almatyda qulaǵan tikushaqtyń borttaǵy qara jáshigi jaqsy saqtalǵan. Bul týraly búgin tikushaq apatyna baılanysty QR Indýstrııa jáne ınfraqurylymdyq damý mınıstrliginiń áýe oqıǵalaryn tekserý basqarmasynyń basshysy Nurlan Jumasultanov aıtty, dep habarlaıdy QazAqparat tilshisi.
Onyń aıtýynsha, quzyrly organdar borttaǵy ózi jazyp alatyn obektıvti baqylaý quraldaryn alyp, taldaýǵa jibermek.
«Qazir qujattardy jınap jatyrmyz. Obektıvti baqylaý quraldary jaqsy saqtalǵan, buzylmaǵan. Biz bárin tárkilep, alyp jatyrmyz. Ony táýelsiz zertteý uıymdaryna saraptamaǵa jiberemiz. Biraq protsess uzaqqa sozylýy múmkin», - dedi basqarma basshysy.
Sonymen qatar, ol qıraǵan tikushaqtyń keıbir synyqtary óndirýshige jiberiletinin aıtty.
«Qıraǵan ushaqtyń synyqtarynyń bir bóligin óndirýshi kompanııaǵa zertteýge jiberemiz. Sebebi, onda tikushaq qozǵaltqyshy týraly kóp aqparat saqtalǵan», - dedi N.Jumasultanov.
Sonymen qatar, ol tikushaqtyń janar-jaǵarmaıy taýsylǵan degen aqparatty joqqa shyǵardy.
«Bak janarmaıǵa toly bolǵan», - dedi ol.
Aıta ketý kerek, qaıǵyly oqıǵa keshe Almatydaǵy Naýryzbaı aýdanyna qarasty «Taý samaly» shaǵynaýdanynda boldy. «Alataý» shıpajaıynyń ashyq aýmaǵyna «Sky Service» áýe kompanııasynyń jeke menshigindegi Evrokopter-130 tikushaǵy qulady. 51 jastaǵy ushqysh Valentın Shıtov jedel járdem kóliginde qaıtys boldy. Tikushaq Boraldaı-Úlken Almaty kóli baǵytynda ushyp bara jatqan.
Al kóliktegi PD qyzmetkerleri atalǵan derekti QR QK 344-babyna («Áýe kóligin paıdalaný kezinde jol qozǵalysy erejelerin buzý») sáıkes sotqa deıingi tergeý isi reestrine tirkedi. Tergeý jumystary bastaldy. Munyń aldynda QR IIDM Áýe oqıǵalaryn tekserý basqarmasynyń basshysy Nurlan Jumasultanov tikushaq apatynyń yqtımal 3 sebebin ataǵan bolatyn.
