«Qulaǵan kirpishter qaryndasymdy beline deıin basyp qaldy» — feldsherge qatysty iste zardap shekken er adam
ASTANA. KAZINFORM — Feldsher Uldana Myrzýannyń qazasyna qatysty sot otyrysynda zardap shekkenderdiń biri Jangeldi Qalıev jaýap berdi. Ol — zardap shekken Aınur Nurpeıisovanyń aǵasy jáne Gúlnár Qalıevanyń inisi. Sondaı-aq, er adam kirpishter ekinshi ret qulaǵanda, ózi de jaraqat alǵanyn aıtty.
Oqıǵa ornyna jetken ol qaryndasy Aınurdyń beline deıin úıindi astynda jatqanyn kórip, kómektesýge tyrysqan. Alaıda kóp uzamaı ózine de kirpishter qulap, esinen tanyp qalǵan.
— Aınur es-tússiz, yńyrsyp jatty. Aınalasy qanǵa boıalǵan edi, — dedi jábirlenýshi.
Alaıda Jangeldi Qalıev oǵan járdemdesip úlgermegen. Kenet joǵarydan qum sebile bastaǵanyn baıqaıdy da, qaıdan túsip jatqanyn bilý úshin basyn kótergen.
— Qum sebile bastady. Shamamen 45 gradýs deńgeıinde basymdy kóterdim. Shatyrdan birdeńe qulap jatyr dep oıladym. Joǵaryǵa qarasam da, eshteńe kórmedim, sosyn basymdy túsirdim. Ári qaraı ne bolǵanyn bilmeımin, esimnen tanyp qaldym, — dedi ol.
Sonymen birge, esinen tanardyń aldyndaǵy sońǵy sátte qasynda eki feldsherdi kórgenin aıtty. Olardyń biri: «Zembil, zembil!» dep aıqaılaǵan. Osy kezde, jábirlenýshiniń aıtýynsha, joǵarydan qaıtadan kirpishter qulaı bastaǵan.
Qaıǵyly oqıǵadan soń, Qalıev jaraqatyna baılanysty aýrýhanada 18 kúndeı jatqan. Alaıda sotta alǵan jaraqattary jóninde naqty málimet bere almady.
— Qazirgi ýaqytta aıta almaımyn. Osy oqıǵadan keıin este saqtaý qabiletim nasharlady, — dep túsindirdi ol.
Odan bólek, er adam 2025 jylǵy shildeden beri osy úıde turatynyn jáne atalǵan oqıǵaǵa deıin qasbette jaryqtar nemese basqa da aqaýlar bar-joqtyǵyn baıqamaǵanyn jetkizdi.
— Eger kórgen bolsam, ol jerden páter satyp almas edim, — dedi ol.
Sottalýshy — páter ıeleri kooperatıvi tóraıymyna qatysty talap-aryzy bar-joǵy týraly suraqqa Jangeldi Qalıev: «Joq, talabym joq», — dep jaýap berdi.
Aıta keteıik, buǵan deıin Uldana Myrzýan qazasyna qatysty iste jábirlenýshi alǵan aýyr jaraqatyn aıtyp, ótemaqy talap etkenin jazǵanbyz.
