Qulaǵan adamdy anyqtap, jedel járdem shaqyrady: petropavldyq oqýshy JI bar kómekshi ázirledi

Jobanyń negizgi maqsaty - jalǵyz turatyn qarttardyń jaǵdaıyn baqylap, tótenshe jaǵdaıda der kezinde kómek kórsetý. Jasandy ıntellektige negizdelgen kómekshiniń avtory - Petropavldaǵy Nazarbaev Zııatkerlik mektebiniń 10-synyp oqýshysy Artýr Shteıner. HelpMate – onyń alǵashqy iri bastamalarynyń biri.

- Baǵdarlamalaýdy Scratch platformasynan bastadym. Alǵashynda shaǵyn oıyndar qurastyrdym. Basqa balalardyń ınternettegi jáne kórmelerdegi jobalaryn kórip, olardyń jumysyna qyzyqtym. Ózim de sondaı paıdaly dúnıe jasaǵym keldi, - deıdi jas ónertapqysh.

Artýrdyń aıtýynsha, jalǵyz turatyn egde jastaǵy adamdardyń jaǵdaıy nasharlaǵan kezde, týystary bul týraly bile bermeıdi. Ásirese, adam qulap qalyp, ózdiginen telefon soǵa almaıtyn jaǵdaıda ýaqyt joǵaltý qaýipti.

HelpMate kómekshisi kamera arqyly adamnyń qulaǵanyn anyqtaıdy, al aqyldy bilezik pýls pen densaýlyqtyń ózge de kórsetkishterin baqylaýǵa kómektesedi. Qaýipti jaǵdaı tirkelse, kómekshi adamnyń týystaryna habarlasady. Qajet bolsa birden jedel járdem qyzmetin shaqyrady. Budan bólek, júıe dári qabyldaý, sý ishý jáne tamaqtaný ýaqytyn eske salady.

Bastapqyda robot retinde jasalǵan joba qazirgi ýaqytta kópshilikke qoljetimdi bolýy úshin mobıldi qosymshaǵa ózgertilip jatyr. Endi arnaıy qurylǵy satyp almaı-aq, qolda bar smartfon men úıdegi tehnıkany paıdalaný múmkin bolmaq. Bul iste oqýshyǵa mekteptegi jetekshisi Ásel Serikqyzy kómektesedi.

- Bul jobamen 2025 jyldyń aqpanynan beri aınalysyp kelemin. Basynda robot tym úlken ári qurastyrýy kúrdeli boldy. Keıin algorıtmdermen jumys istedim. Júıege jaǵdaıdy durys tanyp, qajetti aqparatty este saqtaýdy úıretý oılaǵanymnan áldeqaıda qıyn boldy, - deıdi jasóspirim.

Artýrdyń aıtýynsha, HelpMate prototıpi naqty jaǵdaıda synaqtan ótken. Endigi maqsat - alǵashqy tutynýshylardy taýyp, jobany odan ári damytý. Artýr qosymshany resmı túrde App Store jáne Google Play platformalaryna shyǵarýdy josparlap otyr. Sonymen qatar Qazaqstandaǵy qarttar pansıonattarymen baılanys ornatýǵa kirisken.

HelpMate jobasymen Artýr Social Impact Award Kazakhstan baıqaýynyń fınalısi atanyp, Tech for Impact bastamasy aıasynda óńirdegi bes jobanyń qataryna engen. Jas ónertapqysh qyrkúıek aıynda AI&MedTech Day is-sharasynda da sóz sóılep, sala mamandarymen tanysyp, tájirıbe almasty. Qazir osy baǵyttaǵy áriptestikti jalǵastyryp jatyr.

- Bul men úshin úlken jeńis boldy. Eńbegimniń zaıa ketpegenin sezindim. Sarapshylar jobanyń tájirıbelik paıdasy bar ekenin atap ótti. Osydan keıin HelpMate-ti ári qaraı damytý kerek ekenin túsindim, - deıdi ol.

Jasóspirim sondaı-aq Soltústik Qazaqstannyń agroholdıngterine arnalǵan Gridfrost júıesin de ázirlep júr. Bul joba egis alqaptarynyń jaı-kúıin baqylaýǵa arnalǵan jáne dala jaǵdaıynda synaqtan ótkizilgen.

Aldaǵy ýaqytta Artýr IT salasynda bilim alyp, kásibı turǵyda damýdy josparlap otyr. Ázirge qaı oqý ornyn tańdaıtynyn naqty sheshpegenimen, bolashaqtaǵy baǵytyn aıqyndaǵan.

Buǵan deıin qazaqstandyq jas aspaz Dýlat Tantaev 14 jasynda YouTube-tyń altyn batyrmasyn ıelenip, 17 jasynda Forbes Kazakhstan jýrnalynyń «30-ǵa deıingi 30» reıtıngine engenin jazǵan edik.