Kúlábi, ámire, sarjaý: Qyzylordada úzdik qaýyn sorty anyqtaldy
QYZYLORDA. KAZINFORM – Qorqyt ata atyndaǵy Qyzylorda ýnıversıtetinde kúzgi ónim jınaý merekesi aıasynda «Qaýyn patı» tanymdyq-mádenı sharasy uıymdastyryldy.
Іs-sharany uıymdastyrýdaǵy maqsat – Syr óńiriniń aýyl sharýashylyǵy ónimderin keńinen nasıhattap, baqsha daqyldarynyń erekshelikterin tanystyrý.
Jıynda Syr óńirinde ósiriletin myrzashól, efıopka, sarjaý, qara kúlábi, ámire jáne pıel de sapo sııaqty qaýyn sorttary tanystyryldy. Ýnıversıtettiń «Bıologııa, geografııa jáne hımııa» bilim berý baǵdarlamasynyń aǵa oqytýshy, aýyl sharýashylyǵy ǵylymdarynyń kandıdaty Samalbek Qosanov ár sorttyń qasıeti, ósirilý ereksheligi jáne óńir jaǵdaıyna beıimdiligi jóninde aqparat berdi.
Qatysýshylar ár sorttyń dámin tatyp, baǵa berdi. Daýys berý qorytyndysy boıynsha pıel de sapo sorty joǵary baǵalanyp, Syr qaýyndarynyń arasynda úzdik atandy.
- Bul – ıspandyq selektsııa ónimi. Sońǵy úsh jylda ońtústik aımaqtarda, ásirese, Shıeli aýdanynda keń kólemde ósirilip keledi. Syrtqy pishini qara kúlábige uqsas, dámi erekshe, ózine tán hosh ıisi bar. Salmaǵy 2-3 keli shamasynda, ıaǵnı eýropalyq standartqa sáıkes keletin portsııalyq býdan, - dedi Samalbek Qosanov.
Óńirde osy sııaqty shet elderden ákelingen sorttardy jergilikti klımattyq-tabıǵı jaǵdaıǵa beıimdeýge basa mán berilip otyr.
Buǵan deıin ǵalym oblysynda halyqtyq selektsııa nátıjesinde paıda bolǵan birneshe qaýyn sorty joıylyp ketýdiń sál-aq aldynda turǵanyn aıtyp dabyl qaqqan bolatyn.
