Qul-Muhammed mınıstrlikterde qandaı adamdar jumys isteýi kerektigin aıtty
«Bıyl Elbasynyń bastamasymen Konstıtýtsııaǵa tarıhı ózgerister engizildi. Ol memlekettik basqarýdyń jańa úlgisin qalyptastyrdy. Atqarýshy bıliktiń ókilettigi aıtarlyqtaı ulǵaıdy, barlyq deńgeıdegi memlekettik qyzmetkerlerdiń jaýapkershiligi kúsheıdi. Sondyqtan sapaly jańa apparatty qalyptastyrý jónindegi Memleket basshysy alǵa qoıyp otyrǵan tapsyrmalar múltiksiz oryndalýy tıis. Bizge zańdylyqty qatań saqtaıtyn, kásibı jaǵynan bilikti jáne jaýapkershiligi zor memlekettik qyzmetkerler qajet»,-dep toqtaldy M. Qul-Muhammed memlekettik qyzmetti reformalaý máseleleri jónindegi partııalyq tyńdaýlar barysynda.
Osy oraıda ol Qazaqstanda postkeńestik respýblıkalar ishinde birinshi bolyp 2006 jyly Memlekettik qyzmet jónindegi agenttik qurylǵanyn, sondaı-aq elimiz memlekettik qyzmet týraly zańnamany qabyldaǵanyn eske saldy.
«Sondyqtan Qazaqstandaǵy «Memlekettik qyzmet týraly» Zań da, agenttik te, jalpy qyzmetshilerdiń jumysy da halyqaralyq bıik talaptarǵa saı bolýy kerek dep esepteımiz. Óıtkeni árbir memlekettik qyzmetkerdiń eń basty mindeti - halyqqa qyzmet etip, óziniń bergen sertine adal bolý»,-dedi Qul-Muhammed.
Munymen qosa, «Nur Otan» partııasy Tóraǵasynyń birinshi orynbasary memlekettik qyzmet týraly jańa zańnama qabyldanǵannan beri baıqalǵan ózgeristerge toqtaldy.
«Memlekettik qyzmet týraly jańa Zań qabyldanǵaly bir jylǵa jýyq ýaqyt ótip, osy rette ońtaıly úrdis baıqalyp otyr. Bul zańnama qalaı jumys istep jatqandyǵy turǵysynda tıisti qorytyndy jasaýǵa bolady. Ol qabyldanǵannan keıin 6 myńnan astam memlekettik qyzmetker mansap boıynsha joǵarylady»,-dedi ol.
