Qul-Muhammed: Mańǵystaý - ekonomıkalyq jaǵynan jedel ósip kele jatqan óńir
ASTANA. QazAqparat - Búgin «Nur Otan» partııasy Tóraǵasynyń Birinshi orynbasary Muhtar Qul-Muhammed Mańǵystaý oblysynda bardy. Sapar barysynda ol zamanaýı tehnologııamen jabdyqtalǵan teńiz sýyn tuşytatyn biregeı zaýyttyń jumysymen tanysty. Sondaı-aq, Muhtar Qul-Muhammed elimizdegi eń iri nan kombınatynyń ujymymen kezdesti, dep habarlaıdy oblystyq ákimdiktiń baspasóz qyzmeti.
Elbasynyń tapsyrmasymen «Nur Otan» partııasy mańyzdy memlekettik baǵdarlamalardyń júzege asyrylý barysyna udaıy baqylaý júrgizip keledi. Soǵan oraı memlekettik qarjynyń tıimdi jumsalýyna kóz jetkizý úshin partııa Tóraǵasynyń Birinshi orynbasary oblysqa arnaıy keldi. Tek «Nurly jol» baǵdarlamasy boıynsha 2017 jyly Mańǵystaý oblysyna 80 mıllıard teńge kóleminde qarajat bólindi. Búginde bul qarjyǵa turǵyn úı-kommýnaldyq sharýashylyq nysandary jańǵyrtylyp, mektepter men balabaqshalar salynýda jáne óńirdiń kólik ınfraqurylymy da qarqyndy damýda.
m
Osyndaı memlekettik qoldaýdyń jarqyn kórinisi retinde «Kaspıı» sý tuşytý zaýytyn aıtýǵa bolady. «Nur Otan» partııasy Tóraǵasynyń Birinshi orynbasary Muhtar Qul-Muhammed pen Mańǵystaý oblysynyń ákimi Eraly Toǵjanov zaýyttyń jumys barysymen tanysty.
«Bıylǵy shilde aıynda munda jańǵyrtýdyń birinshi kezeńi aıaqtalyp, «Nurly jol» baǵdarlamasy boıynsha 3 mıllıard teńge bólingen. Memleket qarjysy «Sıemens» jańa nemis qondyrǵylaryn satyp alýǵa jumsalyp, jańǵyrtýdyń nátıjesinde zaýyttyń óndiristik qýaty birden 3 esege deıin artqan. Búginde atalǵan kásiporyn óńirdegi suranystyń 25 paıyzyn taza aýyz sýmen qamtamasyz etip otyr», - dedi Eraly Toǵjanov.
Kásiporynda teńiz sýynan keri osmos ádisimen Qazaqstannyń sanıtarlyq-epıdemıologııalyq talaptary men erejelerine tolyq jaýap beretin taza aýyz sý alynady. Kelesi jyly jańǵyrtýdyń ekinshi kezeńin bastaý josparlanýda. Sonyń nátıjesinde kásiporynnyń óndiristik qýaty táýligine 40 myń tekshe metr sý óndirýge jetpek. Bul degenińiz oblys halqy tutynatyn aýyz sýdyń jartysyn quraıtyn meje.
Memlekettik qoldaýdyń arqasynda Mańǵystaý oblysynda jemisti jumys istep turǵan kásiporyndardyń taǵy biri - «Maǵash nan» JShS. Bul seriktestik tek oblysta ǵana emes búkil elimiz boıynsha eń iri nan kombınaty bolyp tabylady. Búginde munda unnan daıyndalatyn kondıterlik, nan jáne makaron ónimderiniń 150-den astam túri shyǵarylady. Kásiporynnyń eńbek ujymymen kezdesken Muhtar Qul-Muhammed qazirgi zamanǵy nemis tehnologııasynyń jumysymen tanysty. Atalǵan kombınat «Bıznestiń jol kartasy-2020» baǵdarlamasy aıasynda memleketten 6 mıllıard teńge kóleminde qarajat alǵan. Osyndaı qoldaýdyń nátıjesinde óndiris orny jergilikti 224 adamdy turaqty jumyspen jáne jalaqymen qamtamasyz etip otyr.
Mańǵystaý oblysy elimizdegi eń basty munaı óndiretin óńirlerdiń biri ekeni belgili. Sonymen qatar búginde oblysta qaıta óndeý óndirisiniń de ósý qarqyny anyq baıqalady. Tek bıyldyń ózinde ındýstrıaldy-ınnovatsııalyq damý memlekettik baǵdarlamasy boıynsha oblysta jalpy somasy 70 mıllıard teńgeden asatyn jeti iri jobany júzege asyrý josparlanyp otyr.
Sondaı-aq, «Nur Otan» partııasy Tóraǵasynyń Birinshi orynbasary óńirdegi óndiris oryndaryna bilikti mamandar daıarlaıtyn Mańǵystaý polıtehnıkalyq kolledjinde boldy. Qazirgi tańda bul bilim oshaǵy elimizdegi eń úzdik on orta arnaıy oqý oryndarynyń qatarynda. Munda dánekerleýshi, munaı jáne gaz ken oryndaryn paıdalanýǵa berý, tokar, metall óndeý sııaqty oblysta joǵary suranysqa ıe 20 mamandyq boıynsha mamandar daıarlaıdy. Kolledjde 71 oqý kabıneti, 6 sheberhana jáne 9 laboratorııa jumys isteıdi. Barlyq kabınet zamanaýı qondyrǵylarmen jabdyqtalǵan. Sonyń ishinde burǵylaý jumysynyń, avtomabıldiń jáne dánekerleý isiniń vırtýaldi jattyǵý quraldaryn erekshe atap ótken jón. Odan bólek, frezer, tokar stanoktary men 7 kompıýter synyby jáne ınteraktıvti taqtamen jabdyqtalǵan 64 kabınet bar.
Stýdentermen kezdesýinde Muhtar Qul-Muhammed Elbasynyń Qazaqstandy Úshinshi jańǵyrtýǵa arnalǵan tapsyrmalaryn oryndaýdyń mańyzyna toqtalyp, elimizdiń kemel keleshegi týraly aıtty. Sondaı-aq, ol Memleket basshysy júktegen mindetterdi júzege asyrýda óńirdiń belsendiligine nazar aýdardy. Máselen atalǵan kolledjde jastar dýaldi júıe boıynsha bilim alýda. Al áleýmettik seriktestik aıasynda bul oqý orny qazirdiń ózinde túlekterin jumysqa ornalastyrý jóninde 56 kásiporynmen memorandýmǵa qol qoıǵan.
«Mańǵystaý ekonomıkalyq jaǵynan da, demografııalyq jaǵynan da jedel ósip kele jatqan óńir. Sondyqtan bul oblysqa bilikti mamandar kóptep qajet. Qazir myna biz turǵan kolledjde eki myńnan astam jas talapker dýaldi júıe boıynsha mamandyq alyp jatyr. Solardyń ishinde Elbasy tapsyrmasymen júzege asyrylyp jatqan «Sátti qadam» baǵdarlamasymen kelgender de az emes. Óńirde kóbinese tabysty bolashaq dál osyndaı alǵashqy sátti qadamnan bastalady», - dedi Muhtar Qul-Muhammed.
