«Quqyqtyq tártip» sharasy: 4 kúnde izdeýde júrgen 65 qylmysker ustaldy
NUR-SULTAN. QazAqparat - Qazaqstanda elimizdiń tártip saqshylary júrgizgen «Quqyqtyq tártip» jedel aldyn alý sharasynyń 4 kúni ishinde izdeýde júrgen 65 qylmysker ustaldy, dep habarlaıdy QazAqparat QR Іshki ister mınıstrliginiń baspasóz qyzmetine silteme jasap.
Baspasóz málimetterine qaraǵanda, aǵymdaǵy jylǵy 1-5 maýsym aralyǵynda qoǵamdyq jáne jol qaýipsizdigin, kóshelerde jáne basqa da qoǵamdyq oryndarda qylmystardyń aldyn alyp, jalpy quqyqtyq tártipti qamtamasyz etý maqsatynda el aýmaǵynda «Quqyqtyq tártip» jedel aldyn alý sharasy ótkizilýde.
Onyń eń basty mindeti - qylmystardy izin sýytpaı ashý, quqyqbuzýshylyqtardy, sonyń ishinde jol erejesin óreskel buzýshylyqtardyń aldyn alý.
Operatsııa bastalǵan sátten polıtsııa qyzmetkerleri 1200 qylmysty izin sýytpaı ashty, sonyń ishinde erterekte jasalǵan 384 qylmys, naqtyraq aıtqanda 4 kisi óltirý jáne 32 tonaý qylmysy anyqtaldy. Shara barysynda izdeýde júrgen 65 qylmysker ustaldy, onyń 15-ine ótken jyldary izdeý jarııalanǵan bolatyn.
Sonymen birge 36 ákimshilik quqyqbuzýshylyq anyqtaldy. Sonyń ishinde usaq buzaqylyq, ishimdik ishý jáne qoǵamdyq oryndarda mas kúıinde júrý, mas kúıinde avtokólik basqarý, jyldamdyqty shamadan tys arttyrý, temirjol ótkelderinen ótý erejesin saqtamaý, elimizde bolý tártibin buzý sııaqty qylmystar tirkeldi.
Polıtsııa qyzmetkerleri sondaı-aq, esirtki zattaryn zańsyz saqtaýdyń 91 faktisin anyqtady, 40 keli esirtki tárkiledi, sondaı-aq zańsyz saqtalǵan 92 dana atys qarýy alyndy. Onyń 69-y tegis uńǵyly, 16-sy travmatıkalyq nemese gazdy qarýlar.
Jalpy, «Quqyqtyq tártip» jedel aldyn alý sharasy kezinde qalalar men eldimekender kóshelerinde, qoǵamdyq oryndarda jedel jaǵdaıdyń jaqsarǵany baıqaldy.
