«Quqyq tártibi» jedel aldyn-alý is-sharasy aıasynda Almaty polıtseıleri baqsha ónimderin satý oryndaryna reıd júrgizdi
ALMATY. Tamyzdyń 9-y. QazAqparat - Sońǵy kezderi qaýyn men qarbyz satýshylardyń turǵyn massıvterine jaqynyraq, qalanyń ortalyǵyna ońtaıly ornalasýy beleń alyp barady. Sonymen birge, olar ózderi de uǵynbastan, óz minez-qulyqtarymen, júris-turystarymen qalanyń kóriktendirý erejelerin, apatty jaǵdaılar týdyrý men sanıtarlyq-epıdemıologııalyq normalardy buzý sekildi birden birneshe zań talaptaryn buzýda, dep habarlaıdy qalalyq ІІD baspasóz qyzmetinen Gúlnár Jamanqulova.
«Eń bastysy - negizinen, satýshylardyń báriniń baqsha ónimderin satýǵa ruqsat qaǵazdary joq. Biz ákimshilik pen aýdandyq SES ókilderin qatystyra otyryp talaı ret osyndaı tekserý reıdterin júrgizgen bolatynbyz. Alaıda, adamdar zańdy belden basyp, burynǵysha qaýyn men qarbyzdaryn satýlaryn jalǵastyrýda. Aıtqandaı, olardyń qaıdan ákelingendigi men saqtalý jaǵdaıy bizge belgisiz jaǵdaıda qalyp otyr», - dep egjeı-tegjeıli habarlady Jetisý aýdandyq ІІB bastyǵy, polıtsııa podpolkovnıgi Qanat Taımerdenov.
Jýyrda tekserilgen baqsha ónimderin satýdyń 12 stıhııaly núkteleriniń 9-y jasy 30-ǵa deıingi azamattardyń «basshylyǵymen» jumys isteýde. Al olardyń birinde ata-anasymen basqa qalada turatyn jáne mekteptegi oqýynan alastatylǵan 12 jasar ul bala anyqtaldy.
«Biz elimizdiń túkpir-túkpirinen tabys tabý úshin kelgen osyndaı adamdardyń qandaı da bir qylmys jasaýynan qaýiptenýimiz kerek. Nemese, kerisinshe, ashyq aspan astynda túnep júrgen bozbalalardyń ózderi qylmyskerlerdiń qurbanyna aınalýy da yqtımal. Sonymen qatar, satýshylardyń kópshiliginiń óz jeke basyn kýálandyratyn qujattary joq. Baqsha ónimderin satý naýqany naǵyz qyzyp turǵan shaǵyna da qaramastan, Almatydaǵy qylmystyq ahýaldy saýyqtyrý men qaladaǵy qoǵamdyq tártipti saqtaý maqsatynda ýchaskelik ınspektorlar osy ispettes reıdterdi turaqty túrde júrgizip otyratyn bolady», - dep tujyrymdady podpolkovnık Taımerdenov.
Ótkizilgen reıd qorytyndysy boıynsha, saýdagerler polıtseıler men SES qyzmetkerleriniń qatysýymen ózderiniń shatyrlaryn jınastyryp, jaıyna ketti, sonymen birge olar ózderiniń mamandyqtaryn ózgertetindikteri týraly oılanatyny jaıynda ýáde berdi. Áıtse de tártip saqshylary zańsyz satýshylardy ákimshilik jaýapkershilikke tartty.
