Quqyq qorǵaýshy Atbasar túrmesindegi azaptaý týraly: Sottalýshy basynyń aýyratynyna shaǵymdandy

ASTANA. QazAqparat - «Biz azaptaýǵa qarsymyz» qoǵamdyq uıymy basshysynyń orynbasary Baýyrjan Mýsın Atbasar túrmesinde azaptaýǵa tap bolǵan Tımýr Dánebaevtyń densaýlyǵy qandaı jaǵdaıda ekenin aıtty, dep habarlaıdy QazAqparat tilshisi.

«Ol basynyń aýyratynyna shaǵymdandy. «Basym aýyryp júr» dedi. Árıne, odan keıin denesiniń rezeńke taıaqpen urǵan artqy bóligi aýyratynyn aıtty. Taıaq tıgen jerdi mamandar kelip emdegen. Árıne, aýyrady. Al basynyń aýyrǵanyn kitappen urdy dep aıtty. Naqty jaǵdaıdy esine túsire almaı otyr. Óıtkeni qobaljyp otyrdy. Biz medıtsına mamandary tekserip, em taǵaıyndaý kerektigin aıtyp kettik.

Al Qylmystyq-atqarý júıesi komıteti tóraǵasynyń birinshi orynbasary Saǵat Mádıev sottalýshynyń jaǵdaıyn «qanaǵattanarlyqtaı» dep baǵalady. Aıtýynsha, ol da oqıǵa ornyna baryp, sottalýshynyń jaǵdaıyn kórip qaıtqan.

«Onyń jaǵdaıy qanaǵattanarlyqtaı. Denesindegi jaraqattar boıynsha qajetti tergeý áreketteri júrip jatyr. Bul jaǵdaıda denedegi jaraqattary týraly málimet aıtý tergeý qupııasyna jatady. Óıtkeni dálel retinde iske bekitiledi. Biraq qazir onyń jaǵdaıy qanaǵattanarlyqtaı.

Qazir arnaıy prokýratýra tergeý júrgizip jatyr. Sondyqtan qaıda ekenin men aıta almaımyn. Ol aýrýhanaǵa jiberilgen joq», - dedi komıtet ókili.

Buǵan deıin Almaty oblystyq polıtsııa departamentiniń burynǵy bastyǵy, Qańtar oqıǵasynan keıin sottalǵan Serik Kúdebaevtyń Óskemen túrmesindegi sýreti jelige tarap ketýine baılanysty qyzmettik tekserý bastalǵanyn jazǵan edik.