Quqyq qorǵaý uıymy penıtentsıarly júıedegi dene múshesin zaqymdaý týraly aqparatty tekserip jatyr
ASTANA. Shildeniń 27-si. QazAqparat - Qazaqstandyq Ombýdsmenniń tapsyrmasy boıynsha Adam quqyqtary jónindegi ulttyq ortalyqtyń qyzmetkeri Soltústik Qazaqstan oblysyndaǵy ES-164/4 túzetý mekemesinde boldy.
Bul sapar jurtshylyq arasynda dúrbeleń týǵyzǵan, toppen dene múshesine zaqym tıgizý faktisi boıynsha BAQ-ta taralǵan aqparatpen baılanysty, dep habarlady atalmysh vedomstvonyń baspasóz qyzmeti.
2010 jyly, shildeniń 21-22-si kúnderi 37 sottalýshy denelerin zaqymdaý jolymen osy mekemedegi jasalatyn jaǵdaılarǵa narazylyqtaryn bildirgen. Mekemege barǵan ýaqytta barlyq zardap shekken adamdar qajetti medıtsınalyq kómek aldy.
Jalpy sottalǵandar óz shaǵymdary arqyly mekemedegi kommýnaldyq-turmystyq jaǵdaılarǵa, atap aıtqanda sýdyń jetkiliksizdigine, tamaqtaný sapasynyń nasharlyǵyna, medıtsına mamandarynyń sanaýly ǵana ekenine, sondaı-aq turǵylyqty jerleri boıynsha jazany óteý máselelerine qatysty kóńilderi tolmaıtyndyqtaryn jetkizgen.
Qazirgi tańda óz denelerin ózderi zaqymdaý faktisi boıynsha oblystyq prokýratýra tekserý júrgizýde. Soltústik Qazaqstan oblysy ákiminiń janynan jaǵdaımen tanysý men ony turaqtandyrý boıynsha komıssııa qurylyp, aýdandyq jáne oblystyq densaýlyq saqtaý mekemeleriniń medıtsına mamandary sottalǵandardy qabyldap, tekserýden ótkizýdi uıymdastyrǵan.
