Quqyq qorǵaý salasynda jumys isteý ekiniń biriniń qolynan kelmeıdi – zapastaǵy ádilet maıory
PETROPAVL. QazAqparat – Petropavl qalasynyń turǵyny Aısulý Alshynbaeva 15 jylǵa jýyq ishki ister organdarynda jumys istedi. Byltyr zeınet demalysyna shyqqan ádilet maıory «Bıznes-Bastaý» baǵdarlamasy boıynsha kýrstan ótip, búginde hobbıin tabys kózine aınaldyryp otyr, dep habarlaıdy QazAqparat tilshisi.
Toǵyz aı buryn zeınet demalysyna shyqqan Aısulý Alshynbaevanyń qol qýsyryp otyrǵan bir kúni joq. Bir kúni tapsyryspen tort pisirýge ketse, kelesi kúni toıǵa arnalǵan qalta-dorba tigýmen, toıbastar ázirleýmen ótýi múmkin. Odan qoly qalt etse qyz-kelinshekterge manıkıýr jasaıdy. Sheberlik oǵan anasynan darysa, tyrnaqty ásemdeýdi arnaıy kýrsta meńgerdi.
«Maǵan qyzdarǵa qýanysh syılaǵan unaıdy. Jumysyna rıza bolsa, sheberge odan artyq baqyt joq shyǵar. Ózdigimnen kondıterlik isin meńgerdim. Tamaq pisirýdi jaqsy kóremin. Úıde eki tońazytqyshym bar. Jyl boıy dastarhanymnan jemis-jıdek, sańyraýqulaq, kókónis úzilmeıdi. Budan basqa polıgrafııalyq qyzmet kórsetemin. Qoldan erekshe syılyqtar jasaımyn. Munyń bári maǵan tabys qana ákelmeı, janyma raqat syılaıdy», - deıdi Aısulý.
Aısulý Alshynbaeva 15 jylǵa jýyq ishki ister organdarynda eńbek etti. Zeınet demalysyna qylmystyq atqarý júıesinen shtabtyń aǵa ınspektory qyzmetinen ketti.
«Іshki ister organdaryna jumysqa ornalasqanyma eshqashan ókingen emespin desem – ótirik aıtqanym. Kezekshilik, patrýldeý, reıdter – aldyn ala eshteńeni josparlaı almaısyń. Jumysyń da keıde túnge deıin sozylyp ketýi múmkin. Kelgen kezde «nege keldim, ne istep júrmin osynda?» degen suraqtardy ózime jıi qoıatynmyn. Ári meniń burynǵy jumysym da jaman emes edi, mektepten bul salaǵa oqý isiniń meńgerýshisi qyzmetinen keldim. Qıyndyqty jeńýge joldasym kómektesti. Ol da - pogon taqqan qyzmetker», - deıdi zapastaǵy ádilet maıory.
Aısulýdyń aıtýynsha, quqyq qorǵaý salasynda adam eń aldymen ózindik tártipke jáne asqan jaýapkershilikke úırenedi. Bul qurylymnyń artyqshylyqtary óte kóp. Mansabyn joǵarylatyp, jaqsy tájirıbe alýǵa bolady. Áleýmettik jaǵdaı da qarastyrylǵan, zeınet demalysyna da erte shyǵýǵa bolady.
«Áıelderge qaı qyzmette bolsyn qıynyraq. Óıtkeni jumystan bólek ol otbasynyń jaǵdaıyn jasaýy kerek, balasyna qarap, úıiniń sharýasyn tyndyrýy qajet. Kelgen qonaqty kúlip júrip qarsy alyp, shyǵaryp salýy tıis. Er adam sııaqty jumystan keıin sharshadym dep jata almaıdy. Jalpy qyz-kelinshekterge aıtar keńesim – olar qaıda bolmasyn óziniń áıel ekenin umytpaýy kerek. Olar eń aldymen bireýge - ana, bireýge – jar, endi bireýge – qaryndas-apa-sińli. Mende otbasym únemi birinshi orynda turady», - deıdi Aısulý Alshynbaeva.
Aısulý búginde bos ýaqytynyń bárin súıikti isterimen aınalysýǵa arnaǵan. Bólme gúlderin ósiredi, toqıdy, tigedi, otbasylaryn qýantyp túrli torttar pisiredi. Jaqynda «Bıznes-bastaý» baǵdarlamasy boıynsha kýrstan ótken ol óziniń bıznes-jobasyn oıdaǵydaı qorǵap shyqty. Grant alysymen óz kásibin ashyp, josparlaryn iske asyrmaq.
