Quqyq qorǵaý salasynda qyzmet etetin qyz-kelinshekter óz mamandyǵynyń syrymen bólisti
ÓSKEMEN. QazAqparat – Qaı mamandyqtyń bolmasyn ózindik qyzyqtary men qıyndyqtary bar. Al zań salasynda qyzmet etetinderdiń jaýapkershiligi, aýyrtpalyǵy ózgeshe. Sebebi sizdiń sheshimińizdiń, áreketińizdiń arǵy jaǵynda adam taǵdyry jatyr. Búgingi bizdiń maqalamyz sot, polıtsııa men qylmystyq atqarý júıesi organdarynda eńbek etetin názik jandylar jaıly bolmaq.
Sot salasynda – 31 jyl
Raýshangúl Baıjumanova Shyǵys Qazaqstan oblystyq sotynyń sýdıasy bolyp qyzmet etedi. «Týra bıde týǵan joq, týǵandy bıde ıman joq» degen Tóle bıdiń qanatty sózi onyń ustanymyna aınalǵan.
«Áke-sheshem tórt túlikpen as-sýyn tapqan qarapaıym eńbek adamdary. Mektep qabyrǵasynda júrgende-aq zań qyzmetkeri bolýdy qaladym. Bálkim oǵan úıdiń tuńǵyshy bolǵandyqtan baýyr-sińilderime qarap, erte eseıgenim sebep bolǵan shyǵar. Al synyptastarymnyń kóbisi muǵalim nemese dáriger bolǵysy keletin. Qudaıǵa shúkir, maqsatyma jetip 1993 jyldan bastap kúni búginge deıin sýdıa laýazymyn atqaryp kelemin», - deıdi ol.
Sot salasyndaǵy eńbek jolyn osydan 31 jyl buryn sot otyrysynyń hatshysy, keńse meńgerýshisi qyzmetinen bastaǵan. Osy ýaqyt aralyǵynda Besqaraǵaı aýdandyq jáne Borodýlıha aýdandyq sottarynyń sýdıasy, ShQO №2 kámeletke tolmaǵandardyń isteri jónindegi mamandandyrylǵan aýdanaralyq sotynyń tóraǵasy bolyp eńbek etti. Bir qyzynan eki nemere súıip, tárbıelep otyr.
«Jumys barysynda ár túrli isterdi qaradyq. Bul jaýapkershiligi mol, júgi aýyr sala ekendigi aıtpasa da túsinikti. Ár sheshimińniń arǵy jaǵynda adam taǵdyry turady. Ásirese, ishkilikke salynǵan adamdardy ata-analyq quqyǵynan aıyrý týraly isterde óte aýyr. Sebebi qarshadaı balalar áke-sheshesi qandaı bolsa da jaqsy kóredi, qımaıdy. Botadaı bozdap, ata-anasynan aıyrmaýdy suraıdy. Biraq keı jaǵdaıda aıyptalýshy erkekter men áıelder perzentterine joqshylyqtan, ashtyqtan basqa eshteńe bere almaıdy. Ondaıda bala ózi túsinbese de sonyń qamy, bolashaǵy úshin sheshim qabyldaımyz. Alaıda zań boıynsha ata-anasy kez kelgen ýaqytta túzelip, baýyr eti balasyn qaıtara alady», - dedi Raýshangúl Baıjumanova.
Sot tóreligin sapaly júzege asyrǵany jáne Sýdıalar odaǵynyń jumysyna jáne qoǵamdyq sharalarǵa belsendi aralasqany úshin ol birneshe alǵys hattarmen, gramotalarmen marapattalǵan. Al «Úsh bı» tósbelgisiniń ıegeri atanýy kásibı biliktiliginiń joǵary ekendiginiń birden bir dáleli.
Jedel ári jaýapty maman
Saltanat Ojıkanova Shyǵys Qazaqstan oblystyq qylmystyq atqarý júıesinde 2008 jyldan bastap qyzmet atqarady. Eńbek jolyn OV 156/2 mekemesinde zańger laýazymynan bastaǵan. Keıinnen QAJD probatsııa qyzmetine basshylyq etý bóliminiń ınspektory laýazymyna aýysty. Sondaı-aq atalǵan departamentiniń baspasóz hatshylyǵy da onyń mindetinde.
«Ár mamandyqtyń ózindik qyzyǵy men qıyndyǵy bolady. 13 jyldan astam ýaqyt osy salada ter tógip kelemin. Árdaıym birinshi orynǵa jaýapkershilikti qoıamyn. Qyzmetimiz kún demeı, tún demeı jalǵasa beredi. Bul sala árkez asa saq bolýdy, qyraǵylyq pen jedel sheshim qabyldaı bilýdi talap etedi», - deıdi ol.
2021 jyldyń qorytyndysy boıynsha ıdeologııalyq jáne ımıdjdik jumysyn, BAQ ókilderimen ózara is-qımyl jasaýǵa jáne qoǵamnyń pikirine oń yqpal etýge baǵyttalǵan qyzmetin joǵary deńgeıde atqarǵanynyń nátıjesinde respýblıka kóleminde Shyǵys Qazaqstan oblysy aldyńǵy qatarǵa shyqqan.
Qyzmetine adaldyq tanytyp, eńbeksúıgishtigimen erekshe kózge túskeni úshin birneshe ret QR QAJ komıtetiniń, ShQO boıynsha QAJD bastyǵynyń gramotalarymen jáne alǵys hattarymen marapattalǵan.
Otbasy men qyzmetin qatar alyp júrgen Saltanat Daýletbekqyzy búginde eki uldyń anasy. Úlkeni 4-synypta, al kishisi 1-synypta oqıdy.
«Jumysta júrip keıde otbasyma, balalaryma kóńil bóle almaı qalatyn kezderim de bolady. Mundaıda joldasym qoldaý kórsetip otyrady. Qyzmetimdi jaýapkershilikpen atqaryp júrgenim – birinshi kezekte shańyraǵymdaǵy bereke-birliktiń, tiregime aınalǵan jubaıymmen aradaǵy syılastyq pen túsinistiktiń arqasy», - deıdi Saltanat Ojıkanova.
Burynǵy muǵalim, qazirgi polıtseı
Gúlnur Túsipova 1985 jyly Shyǵys Qazaqstan oblysy Kókpekti aýdany Úlken-Bóken aýylynda dúnıege kelgen. Qazirgi ýaqytta Óskemen qalalyq PB Ertis polıtsııa bóliminiń kámelettik jasqa tolmaǵandar isi jónindegi aǵa ýchaskelik ınspektory bolyp jumys isteıdi.
«Shynymdy aıtsam, ishki ister organyna jumysqa oıda joqta ornalastym. S.Amanjolov atyndaǵy ShQÝ-dyń «fılologııa» fakýltetin aıaqtaǵan soń, Rıdder shaharyndaǵy bilim ordasynda joǵarǵy synyptarǵa qazaq tili men ádebıet páninen sabaq berdim. Mektep qabyrǵasynda júrgende ózimdi basqa salada kórgim keldi. Sol kezde gazetterdiń birinen Óskemen qalasy Іshki ister basqarmasynyń Aqparat bólimine qazaq tilinen aýdarmashy qajet degen habarlamany kórip qaldym. Sóıtip, sol jaqqa jumysqa ornalastym», - deıdi polıtsııa maıory.
Osylaısha, ol janyna jaqyn mamandyqty tapqan. 2012 jyly kámelettik jasqa tolmaǵandar isi jónindegi ýchaskelik polıtsııa ınspektory bolyp ornalasty.
«Eń birinshi leıtenant shenin alyp, forma kıgendegi áserim erekshe boldy. Sol kezde ózińe artylǵan mindet pen jaýapkershilikti sezinedi ekensiń. Bul ómirde áıel zatynyń orny erekshe ǵoı. Áıel – ardaqty ana, aıaýly jar. Qajet bolsa qolyna qarý alyp, Otanyn qorǵaýǵa daıyn batyr da bolady», - deıdi Gúlnur Túsipova.
Onyń aıtýynsha, ishki ister organynda er adamdarmen ıyq tirese jumys istep júrgen qyz-kelinshekter kóp. Ásirese kámelettik jasqa tolmaǵandardyń isi jónindegi bólimde kóbinese názik jandylar qyzmet atqarýda.
«Sebebi minez-qulqy qıyn balanyń tilin tabý, eshkimge boı bermeıtin jasóspirimge aqyl aıtý, araqqa salynyp óz balasyna qaramaı júrgen áıelge kómektesý – er azamatqa qaraǵanda bizge jeńildeý. Meniń oıymsha, áıel óz otbasyna, balasyna kóńil bólip, olardyń muń-muqtajyn tyńdap, eki jaqty birdeı alyp júre bilýi kerek. Jumys barysynda anasynan aıyrylǵan balany kórgen soń, úıge kelgende óz balapanyńdy qatty qushaqtap: «Shirkin, ómirdegi barlyq bala baqytty bolsa ǵoı» dep oılaısyń», - deıdi ınspektor.
Bir kúni oǵan áke-sheshesinen aıyrylǵan tul jetim uldy Balalar úıine qujattary rásimdelgenshe beıimdeý ortalyǵyna aparý jaıly tapsyrma berildi.
«Mektepten balany qarsy alyp, ákimshilikten barlyq qujattaryn aldym. 7-synyp oqýshysymen birge avtobýsqa otyryp, beıimdeý ortalyǵyna qaraı jol tarttyq. Qaıda bara jatqanymyzdy suramady, ishteı bárin sezetindeı. Sol kezde júregim aýyryp: «Baıǵus, balaqaı. Anasynyń aıaýly alaqanyna ne jetsin» degen oımen men de únsiz otyrdym. Beıimdeý ortalyǵynyń qyzmetkerleri balany tekserip, qujattaryn qabyldap aldy. Balany qımaı biraz turdym. Kenet bir jas jigit ishke kirip kelip balany bassaldy. Sóıtsem, aǵasy eken. Ekeýi jylap, bir-birin qushaqtap tur», - deıdi Gúlnur Túsipova.
Aǵasy 18 jastan endi asqan stýdent bolsa da jumys isteıtinin artynan bilgen. Sol jumys ornyndaǵy bastyǵy «Balany ázirshe biz asyrap alaıyq. Keıin óz qolyńa alasyń» depti.
«Aǵasynyń inisine aıtqan: «Men seni tastamaımyn. Alyp ketemin. Sál shyda, baýyrym» degen sózderi áli esimde. Jumysymyzda osyndaı ókinishti jaǵdaılarmen kúnde kezdesemiz», - deıdi saqshy áıel.
Búginde maıor eki ul tárbıelep otyr. Joldasy – jeke kásipker. Ol jubaıynyń jumysyma túsinistikpen qarap, árqashan qoldaý tanytyp keledi.
