Quqyq qorǵaý salasynda adal qyzmetkerlermen qatar naǵyz alaıaqtar da jumys isteýde - Advokattar odaǵy
Bul týraly búgin Lev Gýmılev atyndaǵy Eýrazııa ulttyq ýnıversıtetinde «Sot salasyndaǵy ókilettilik ınstıtýtyn jetildirý: quqyq tártibin qoldaný jáne júrgizý máseleleri» taqyrybyndaǵy Halyqaralyq ǵylymı-praktıkalyq konferentsııada Qazaqstannyń advokattar odaǵynyń tóraǵasy Ánýar Túgel málim etti, dep habarlaıdy QazAqparat.
Odaq basshysynyń aıtýynsha, elimizdegi úleskerler máselesin sheshý jumysyna, kóbinese, buǵan deıin alaıaqtyq úshin sottalǵan azamattar qatysady. Máselen, Aqmola oblystyq sotynda quqyq qorǵaýshy retinde qyzmet atqaryp jatqan Artıýshına (keı kezde ol ózin Sıtova dep tanystyrady) kezinde alaıaqtyq úshin 7 jylǵa sottalǵan bolatyn. Al Pavlodar oblysynda Gýbına esimdi azamat jol-kólik apatyna ushyraǵan kisiniń quqyǵyn qorǵaımyn dep sottyń sheshimin qoldan jasap, ony oryndaý úshin Sottar ákimshiligine tapsyrǵan. «Ondaı oqıǵalar kóptep oryn alýda. Qanshama azamattar sodan zardap shegip, nátıjesinde elimizdiń sot júıesine degen halyqtyń senimi tómendeıdi», - deıdi Á.Túgel.
Qazaqstannyń Bas advokaty atap kórsetkendeı, qazirgi kezde azamattardyń quqyǵyn qorǵaıtyn azamattardyń ishinde psıhıkalyq aýrýlarǵa dýshar adamdar da kezdesedi. Olar zańgerlik keńesterdi berip qana qoımaı, qajetti qujattardy emin-erkin rásimdep, sottaǵy taraptardyń quqyǵyn qorǵap júr. «Búginde ondaı azamattar advokattardyń ornyn basyp aldy deýge bolady. Biraq olar kásibı zańgerler sııaqty emtıhan tapsyrmaıdy, tegin zańgerlik kyzmet kórsetpeıdi, etıka zańdaryna baǵynbaıdy, salyq tólemeıdi jáne, eń bastysy, kásibı antty bermeıdi. Osynyń nátıjesinde elimizdiń quqyq qorǵaý qyzmetiniń bedeli túsip, memlekettik júıege degen kózqaras ózgerýde», - deıdi Á.Túgel. Osy oraıda Qazaqstannyń advokattar odaǵynyń tóraǵasy quqyq qorǵaý qyzmetterin usynatyn azamattar úshin biryńǵaı talaptardy zańmen bekitýdi usynyp otyr.
