Quqyq qorǵaý organyna úmitkerlerdi polıgrafologııalyq tekseristen ótkizetin zań jobasy maquldandy - Májilis
ASTANA. 3 sáýir. QazAqparat - Búgin Parlament Májilisiniń jalpy otyrysynda palata depýtattary «Quqyq qorǵaý qyzmeti týraly» zańǵa ózgeris pen tolyqtyrýlar engizý týraly» zań jobasyn ekinshi oqylymda maquldady.
Zań jobasy quqyq qorǵaý organdaryna qyzmetke turýǵa kandıdattarǵa mindetti túrde polıgrafologııalyq zertteýdi qoldaný tártibin bekitedi. Bul rette zań normalaryna «polıgrafologııalyq zertteý», «psıhofızıologııalyq kýálandyrý» degen jańa uǵymdar engiziledi.
Ekinshi oqylymǵa ázirleý barysynda depýtattar polıgrafologııalyq zertteýden ótý mindetterin pysyqtaýǵa baǵyttalǵan túzetýler usynǵan bolatyn. Atap aıtqanda, depýtattar polıgrafty qoldaný aıasyn keńeıtýdi jáne ony tek quqyq qorǵaý qyzmetine qabyldanǵan kezde ǵana emes, sondaı-aq quqyq qorǵaý organdarynyń qyzmetkerlerin attestattaý, qajet bolǵan jaǵdaıda olarǵa qatysty qyzmettik tergeý júrgizý kezinde de qoldanýdy usynady. Budan bólek, quqyq qorǵaý qyzmetinde bolýdyń shekti jasyn ulǵaıtý usynylady.
«Prokýratýra organdaryna kadr daıarlaýdyń keıbir erekshelikteri eskerile otyryp, osy organǵa birinshi ret qyzmetke turatyn azamattar úshin bir jylǵa deıin synaqty belgileıtin jańa norma bekitildi. Bir quqyq organynan ekinshisine aýysýy kezindegi problemalar, onyń ishinde áskerı, arnaýly ataqtardy, synyptyq shenderdi teńestirý máseleleri óz sheshimin tapty», - deıdi depýtat Ramazan Sárpekov.
