Quqyq qorǵaý organdarynyń jumys isteý ádisterin jetildirý qajet - Ahmetjan Esimov
ALMATY. 4 shilde. QazAqparat - Sońǵy 5 jylda Almatyda ishki ister departamentin qarjylandyrý 90 paıyzǵa ulǵaıdy.
Ony qala ákimi Ahmetjan Esimov búgin Operatıvti basqarý ortalyǵynyń jańa tehnıkalyq múmkindikterimen tanysqan shahar basshysy megapolıste krımınogendik jaǵdaıdyń turaqty ekendigin atap ótti. Degenmen turǵyndar jemqorlyq pen sybaılastyqqa qatysty jıi shaǵymdanýda. Ásirese Jol polıtsııasynyń respýblıkalyq komıteti Jol polıtsııasy basqarmasynyń bastyǵy men onyń orynbasarlaryn jáne tirkeý-emtıhan alý bólimderiniń bastyqtaryn, batalon komandırlerin taǵaıyndaý men bosatý quqyǵyn ózine alǵaly beri shaǵym men aryz kóbeıip ketken.
«Quqyq qorǵaý organdarynyń tehnıkalyq bazasyn nyǵaıtýǵa, qyzmetkerlerdi qamtýǵa úlken qarjy kózderi bólinýde. Bıyl ІІD-ine 13,6 mlrd. teńge bólinip otyr. Bul ótken jylmen salystyrǵanda 23 paıyzǵa joǵary. Sońǵy úsh jylda qalalyq bıýdjet qarjysy esebinen 420 jańa kólik satyp alynyp, ІІD-niń avtoparki jartylaı jańartyldy. Byltyr qyzmetkerlerdiń jalaqysy 30 paıyzǵa ósti. Quqyq qorǵaý organdary tarapynan qaıtarym bolǵany jón, sondyqtan da olar ózderiniń jumys isteý ádisterin turaqty jetildirip otyrýlary tıis», - dedi Ahmetjan Esimov. Sondaı-aq aıyppul salý kóleminiń azaıýy máselesin qozǵady. Eger 2009 jyly aıyppul kólemi 1 636 mln. teńge bolsa, 2011 jyly ol 872 mln. teńgege deıin azaıǵan. Al bıyl jyl basynan beri 281 mln. teńgege aıypul salynǵan.
«Qalada kólik sany artýda. Jol polıtsııasy qyzmetkerleriniń qatary kóbeıip, olar tolyq jabdyqtalǵan. Biraq jumys báz-baıaǵy qalpynda. Bul paradoks pa, álde oılanýdy qajet ete me!? Sońǵy jyly túsken shaǵymnyń 90 paıyzy jol polıtsııasy qyzmetkerleriniń jumysyna qatysty», - deıdi Ahmetjan Smaǵululy.
