Quqyq qorǵaý organdarynyń zańsyz áreketterine qatysty 363 shaǵym tústi

NUR-SULTAN. QazAqparat – Búgin Ortalyq kommýnıkatsııalar qyzmetinde QR Bas prokýratýrasy 1-qyzmet bastyǵynyń orynbasary Eldos Qılymjanov quqyq qorǵaý organdarynyń zańsyz áreketterine qatysty ótinishter tekserilip jatqanyn aıtty, dep habarlaıdy QazAqparat tilshisi.

«Quqyq qorǵaý organdarynyń zańsyz áreketterine qatysty ótinishterdi tekserýge erekshe kóńil bólinip otyr. Qazirgi ýaqytta prokýratýraǵa osyndaı 363 shaǵym tústi. Sybaılas jemqorlyqqa qarsy qyzmetiniń qaraýynda tergeýdiń ruqsat etilmegen ádisteri týraly 178 qylmystyq is bar. Arnaıy prokýrorlarmen 8 qylmystyq is tergeýge alyndy. Onyń ishinde Atyraý qalasyndaǵy «Dınamo» stadıonynda ustalǵandar men bolǵan oqıǵa, Almaty oblysynyń polıtsııa ǵımaratyndaǵy Batyrbaevtyń, kámelet jasqa tolmaǵan Esbolatulynyń jáne basqalarǵa kúsh qoldaný týraly aryzdary, sondaı-aq, ózge de qoǵamdyq rezonans týdyrǵan faktiler», - E. Qılymjanov.

Onyń aıtýynsha, árbir qylmystyq is baqylaýda tur. Naqty nusqaýlar berildi. Protses prokýrorlary taǵaıyndaldy.

Budan buryn habarlanǵandaı, bıyldyń 16 aqpanyndaǵy jaǵdaı boıynsha Bas prokýratýranyń, Іshki ister mınıstrliginiń, Ulttyq qaýipsizdik komıtetiniń jáne Sybaılas jemqorlyqqa qarsy is-qımyl qyzmetiniń tergelýindegi barlyq qylmystyq ister boıynsha 741 kúdikti sot sanktsııasymen qamaýda.

Sonymen qatar, Eldos Qılymjanov urlanǵan qarýdyń qaı bóligi tabylǵanyn aıtty.