Quqyq qorǵaý organdarynyń qyzmetin túbegeıli ózgertý qajet - depýtat M.Ábenov
ASTANA. 3 qyrkúıek. QazAqparat - Quqyq qorǵaý organdarynyń qyzmetin júıeli túrde ózgertý qajet. Ony saqshylardyń mádenıetinen bastaǵan jón.
Búgin V saılanǵan Parlamenttiń ekinshi sessııasynyń ashylýy aıasynda jýrnalısterge suhbat bergen Parlament Májilisiniń depýtaty Murat Ábenov osylaı aıtty.
«Menińshe, búginde quqyq qorǵaý organdarynyń qyzmetin júıeli túrde ózgertý qajet. Ol úshin arnaıy zań qabyldaǵan jón. Endi, qarańyzshy, qazirgi kezde qoǵamda quqyq qorǵaýshylardy jurtty ańdyp júrgen adamdar retinde qabyldaıdy. Halyq olardan qorqatyn boldy. Ol durys emes. Biz, kerisinshe, olarǵa naǵyz qorǵaýshy retinde qaraýymyz kerek qoı. Sondyqtan quqyq qorǵaý organdarynyń qyzmetin túbegeıli ózgertý qajet», - deıdi M.Ábenov. Depýtattyń oıynsha, ol ózgeristerdi quqyq qorǵaýshylardyń mádenıetinen bastaý qajet. «Áıtpese, jol-kólik polıtseıleriniń ózderi qaýipsizdik belbeýlerin taqpaı, qozǵalys erejelerin buzyp júredi. Onyń bári halyqtyń keri kózqarasyn qalyptastyrady», - deıdi halyq qalaýlysy.
