Quqyq qorǵaý organdarynyń keleshek basshylary ujymdy tıimdi basqarýdy oqyp-úırendi

ASTANA. QazAqparat - Búgin Astana qalasynda QR Bas prokýratýrasynyń janyndaǵy Quqyq qorǵaý organdary akademııasynda quqyq qorǵaý organdary basshylyǵynyń Prezıdenttik rezervinde turǵan qyzmetkerler úshin kásibı deńgeıdi arttyrýdyń alǵashqy kýrstarynyń ashylý saltanaty ótti. Bul týraly atalmysh oqý ornynyń baspasóz qyzmeti habarlady.

Oqytýdyń negizgi maqsaty - tyńdaýshylardyń basshy laýazymǵa taǵaıyndaý úshin qajetti kásibı daǵdylary men basqarý quzyretin jetildirý.

Arada sóz sóılegen Bas Prokýrordyń birinshi orynbasary Iogan Merkel Memleket basshysy qoıǵan mindetterdi iske asyrý jolynda jańa turpattaǵy basshylardy - kóshbasshylar men qazirgi menedjerlerdi daıarlaýdyń mańyzdylyǵyn atap ótti.       

Akademııanyń rektory Ulan Baıjanov qatysýshylardy kýrs baǵdarlamasynyń ereksheligimen tanystyra kelip, barlyq tyńdaýshylardy belsendi ári nátıjeli jumys isteýge shaqyrdy.        

Kýrstardyń taqyryby ulttyq qaýipsizdikti qamtamasyz etý, terrorızm men ekstremızge, sybaılas jemqorlyqqa qarsy is-qımyl, qylmystardy ashý men tergeýdegi zamanaýı aqparattyq tehnologııalardy paıdalanýdyń strategııalyq máselelerin qamtıdy.

Іs-sharaǵa dáris oqýshy retinde jetekshi otandyq jáne sheteldik sarapshylar, sondaı-aq memlekettik organdar basshy quramynyń ókilderi qatysatyn bolady.

Bas prokýratýra janyndaǵy Quqyq qorǵaý organdarynyń akademııasy Quqyq qorǵaý júıesin jańǵyrtýdyń memlekettik baǵdarlamasyn iske asyrý sheńberinde Prezıdenttiń tapsyrmasymen quryldy. Onyń quramynda úsh ınstıtýt bar: Joǵary oqý ornynan keıingi bilim berý ınstıtýty, Kásibı bilim deńgeıin arttyrý ınstıtýty jáne Vedomstvoaralyq ǵylymı-zertteý ınstıtýty.