Quqyq qorǵaý organdarynda merziminen buryn ataq berý tártibi ózgeredi

NUR-SULTAN. QazAqparat – Ataqtardy merziminen buryn berý jáne kezekten tys ataqtar berý tártibi ózgeredi. Bul týraly Májilistiń jalpy otyrysynda tıisti zań jobasyn talqylaý kezinde QR Bas prokýrorynyń orynbasary Áset Shyndalıev aıtty, dep habarlaıdy QazAqparat tilshisi.

Búgin Májiliste «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.

«Kótermeleý retinde merziminen buryn ataq-shender berý tártibi kúsheımek. Qazirgi zań boıynsha qyzmetkerlerge kótermeleý arqyly 6 ret ataq-shender berýge bolady. Zań jobasynda kótermeleý arqyly ataqtardy eki-aq ret berý usynylady», - dedi Áset Shyndalıev.

Onyń aıtýynsha, qyzmetkerlerdi baǵalaýǵa, olardy kótermeleýge, tártiptik jaýapqa tartýǵa arnalǵan túzetýler usynylady.

Budan buryn habarlanǵandaı , quqyq qorǵaý organdaryna qyzmetke qabyldaýda jańa ózgerister engizilip otyr.