Quqyq qorǵaý organdaryna qyzmetke qabyldaýda ózgerister bolady
Aıta keteıik, búgin palatanyń jalpy otyrysynda «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
«2011 jyly quqyq qorǵaý qyzmeti týraly arnaıy zań qabyldandy. Bul zańmen qyzmetkerlerdi áleýmettik, quqyqtyq jáne ózge de qamtamasyz etý máseleleri bir izge keltirildi, orta standarttar bekitildi. Degenmen, áli de retteýdi qajet etetin máseleler bar. Atap aıtsaq, barlyq organdar úshin kadrlyq protsesti, qyzmetkerlerge qoıylatyn talaptardy birdeı etý qajet. Onyń ishinde qyzmetkerlerdi kótermeleý, jaza qoldaný, ataq-shenderdi berý, arnaıy organdardan aýysý, attestatsııalaý jáne jumysyn baǵalaý máseleleri. Osylardy retteý maqsatynda zań jobasy ázirlendi. Ondaǵy birinshi másele – qyzmetke qabyldaý tártibin ońtaılandyrý», - dedi Á. Shyndalıev.
Osy oraıda ol 2019 jyly depýtattardyń qoldaýymen zańǵa túzetýler jasalyp, tómengi laýazymdarǵa kadrlar daıyndaýdyń jańa tártibi engizilgenin eske saldy.
«Qazir tómengi qyzmetterge alý úshin jas mamandar mindetti túrde quqyq qorǵaý akademııalaryn bitirýi tıis. Al endi orta jáne joǵary laýazymdarǵa kelsek, bul qyzmetterge quqyq qorǵaý ári arnaıy organdarda, memlekettik jáne áskerı qyzmette buryn bolǵandar, sýdıalar qabyldana alady. Olar konkýrs arqyly jáne konkýrstan tys tártipte qyzmetke alynady. Osy másele boıynsha zań jobasynda birqatar ózgeris usynylǵan. Konkýrs arqyly negizinen aǵa basshysy quramdarǵa jetkilikti tájirıbesi bar adamdar taǵaıyndalady. Olardy taǵylymdamadan ótkizýdiń qajeti az. Sondyqtan zań jobasy konkýrs boıynsha taǵaıyndalǵan kandıdattar úshin taǵylymdamany alyp tastaýdy usynady. Al arnaıy tekserýden konkýrstan soń ótedi. Bul túzetýler qyzmetke qabyldaý protsesin tezdetýge, qajet mamandardy jumysqa alýdy jyldamdatýǵa múmkindik beredi», - dedi Bas prokýrordyń orynbasary.
Onyń sózine qaraǵanda, qazir konkýrstan tys oblystyq quqyq qorǵaý organdarynyń bastyqtary qabyldasa, endi tek ortalyq organ basshysy ǵana qabyldaıdy. Qabyldaý talaptary da kúsheıtiledi.
«Endi qyzmetke alý úshin 3 jyl eńbek ótili kerek bolady. Al áskerde qatardaǵy soldat bolǵandar tek jalpy negizde qabyldanady. Kúshtik organdarǵa jumys istep júrgen qyzmetkerler quqyq qorǵaý salasyna aýysý arqyly qabyldana alatyn bolady. Búginde olar arnaıy tekserýden, áskerı dárigerlik komıssııadan, polıgraftan, testiden ótken soń ǵana qabyldanady. Endi bul talaptar alyp tastalmaq», - dedi Áset Shyndalıev.
