Quqyq qorǵaý organdaryna qabyldaýdaǵy polıgraftyq tekserýler 2015 jyly tolyq qoldanysqa enedi - ІІM
ASTANA. QazAqparat - Quqyq qorǵaý organdaryna qabyldaý barysyndaǵy polıgraftyq tekserýler 2015 jyly tolyqtaı qoldanysqa enedi. Bul týraly búgin Parlament Májilisinde «Qazaqstan Respýblıkasynyń Ulttyq ulany týraly» zań jobasyn talqylaý barysynda ishki ister mınıstriniń orynbasary Marat Demeýov málimdedi.
Zań jobasyn talqylaý barysynda depýtat Janat Jarasov qoldanystaǵy zańǵa sáıkes quqyq qorǵaý organdaryna, arnaıy organdarǵa qabyldaý barysynda tulǵalar polıgraftyq tekserýden ótetinin eske salyp, qaralyp otyrǵan zań jobasynda da osy másele qamtylǵanyna toqtaldy.
«Quqyq qorǵaý organdaryna qabyldaý barysyndaǵy polıgraftyq zertteýler júrgizýdiń tártibi qandaı? Bundaı tekserý ózin qoldaný turǵysynan qalaı kórsetti? Biz osy polıgraftyq tekserýlerdi ýaqytynda engizip otyrmyz ba?», - dep surady depýtat J.Jarasov.
Óz kezeginde ishki ister mınıstriniń orynbasary polıgraftyq zertteýlerdi engizýde álemdik tájirıbeler, sonyń ishinde TMD elderiniń tájirıbeleri zerdelengenin, al osy júıege 2013 jyly Bas prokýratýra bastama jasaǵanyn tilge tıek etti.
«Tek bıylǵy jyldyń maýsym aıynda ǵana polıgraf júrgizý erejeleri týraly Úkimet qaýlysy shyqty. Myna zań jobasynda da ondaı taldaýdan ótetin tulǵalar sanaty bekitilip otyr, olardy quqyq qorǵaý organdarynyń basshylary aıqyndaıdy. Suraqqa kelsek, Úkimet qaýlysy aǵymdaǵy jyly ǵana qabyldanǵanyna baılanysty jyl sońyna deıin biz polıgraf boıynsha materıaldyq-tehnıkalyq jaraqtandyrý, polgraftyq tekserý júrgizetin jeke quramdy oqytý máselelerin tolyq sheshemiz. Sondyqtan da polıgraftyq tekserýler 2015 jyldyń qańtarynan bastap tolyqqandy jumysqa kirsedi», - dedi M.Demeýov.
Onyń sózine qaraǵanda, polıgraftyq zertteýlerge qatysty qandaı da bir saraptamalar jasalmaǵan.
