Quqyq qorǵaý organdaryn reformalaýǵa qatysty zań osy salada jańa standarttar qalyptastyrady
ASTANA. 20 qańtar. QazAqparat /Aıdar Ospanalıev/ - Quqyq qorǵaý organdaryn reformalaý sharasyn júrgizý máselesiniń kóterilgenine keminde 5 jyl boldy. Ótken jyldyń sońynda ony zań júzinde bekitý máselesi sheshildi.
Endi Elbasy oǵan qol qoıyp, qujat kúshine endi. Bul týraly búgin Bnews.kz portaly arqyly ótken on-laın konferentsııa barysynda Ádilet vıtse-mınıstri Dýlat Qusdáýletov aıtty.
Onyń sózine qaraǵanda, quqyq qorǵaý salasyn reformalaýǵa qatysty qujatta barlyǵy 17 zań bar. Olardyń barlyǵy quqyq qorǵaý salasyn reformalaýdy qarastyrady jáne ol barlyq quqyq qorǵaý organdaryn qamtıdy. 17 zańnyń 6-ýyn Ádilet mınıstrligi daıyndady.
«Bul negizgi zańdar. Al ózge zańdar quqyq qorǵaý qurylymyn reformalaýǵa baǵyttalǵan. Mysaly, ishki ister salasyndaǵy ýaqytsha oqshaýlaý, beıimdeý men saýyqtyrý ortalyqtary (TsVIARN) men aıyqtyrǵyshtar Bilim jáne ǵylym mınıstrlikteri men Densaýlyq saqtaý vedomstvolaryna beriledi. Sondaı-aq Eńbek jáne halyqty áleýmettik qorǵaý mınıstrligi men Ádilet mınıstrliginiń jekelegen qyzmetteri ishki ister salasyna beriledi. Sebebi Іshki ister mınıstrligi ishki jáne syrtqy kóshi-qon máselelerimen aınalysady. Buǵan qosa, buryn qylmystyq jazasyn ótep shyqqan azamattardy jumyspen qamtý jáne olardyń ózge de máselelerimen Ádilet mınıstrligi aınalysyp kelse, qazir bul mindet jergilikti atqarýshy organdarǵa júkteldi. Al Ádilet mınıstrliginiń qaraýyna Joǵarǵy sottyń quzyryndaǵy Sot oryndaýshylar komıteti berilip otyr. Bul ózgeristerdiń barlyǵy mınıstrlikter men vedomstvolardyń salalyq zańdarynda kórsetilgen»,-dedi vıtse-mınıstr.
Onyń sózine qaraǵanda, quqyq qorǵaý organdaryn reformalaý jumystary óte iri sharalardyń biri deýge bolady. Onda quqyq qorǵaý salasy qyzmetkerleriniń shenderi úshin tólenetin qarjynyń belgili bir deńgeıde bolýy, ıaǵnı onyń standarttaryn qalyptastyrý, kadr saıasaty jáne quqyq qorǵaý salasy qyzmetkerleriniń áleýmettik jaǵynan qamtamasyz etý máselesi qarastyrylǵan. «Buryn bul máselelerdiń barlyǵy ár memlekettik organda árqalaı edi», -dedi D.Qusdáýletov.
