Quqyq qorǵaý organdary tarapynan azapqa ushyraǵandar ómir boıy bılikke ókpeli - Jaqyp Asanov
«Kún tártibinde taǵy bir másele bar. Ol - azaptaýmen kúresý. Bul adamǵa qarsy jasalatyn eń qatygez, eń aıaýsyz qylmystar. Keıbir qyzmetkerlerimiz qolyndaǵy bılikti paıdalanyp, adamdarymyzdy qınaıdy, uryp-soǵady, aryn aıaqqa basady. Bul shynyn aıtsaq sumdyq, 21 ǵasyrda», - dedi Asanov.
Osy oraıda Bas prokýror quqyq qorǵaý organdary tarapynan azamattaryń azapqa ushyraýyna qatysty eki mysal keltirdi.
«Máselen, Qaraǵandyda Sınıavın degen azamatty azaptaǵany sonshalyq, ol epılepsııaǵa ushyrap, qazir múgedek. Slekıshına. Muny búkil respýblıka biledi, el biledi. Aqparat quraldary jarysa jazdy. Slekıshınaǵa qatysty tek osy bir fakti ǵana búkil quqyq qorǵaý júıesine kir keltirdi», - dedi ol.
Sonymen qatar ol bul tek ashylǵan qylmystar ekendigin aıtty.
«Al ashylmaǵandary, dálelsiz qalyp jatqany qansha bilmeımiz. Azapqa ushyraǵandar bular qorǵaýdyń ornyna qorlaıdy, dep ómir boıy bılikke ókpeli. Osydan keıin bizge halyq tarapynan qandaı senim bolýy múmkin? Sondyqtan biz bul máselemen aınalysyp jatyrmyz. Arnaıy top qurdyq Iogan Davydovıchtyń basshylyǵymen arnaı top jumys isteıdi», - dedi Jaqyp Asanov.