Quqyq qorǵaý organdary qyzmetkerleri páterdi óteýsiz jekeshelendire alady – zań jobasy

NUR-SULTAN. QazAqparat – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

«Zańnamalyq ózgeristerdiń bir blogy qyzmetkerlerdi áleýmettik qamtamasyz etý máseleleri quraıdy. 20 jyl eńbek ótili bar nemese 10 jyl eńbek ótili bar jáne múgedek balasy bar qyzmetkerlerge memlekettik qordan alǵan úıdi aqysyz jekeshelendirýi kózdelgen», - dedi

QR Bas prokýrorynyń orynbasary Áset Shyndalıev.

Sonymen qatar ol qyzmette júrip, aýyryp qaıtys bolǵandardyń otbasyna ótemaqy tóleý usynylyp otyrǵanyn aıtty.

«Qaıtys bolǵan qyzmetkerdiń otbasyn turyp jatqan úıinen shyǵarýǵa tyıym salynatyn norma bar. Іshki ister organdarynda buryn qyzmet etken birqatar qyzmetkerdiń eńbek sińirgen jyldary boıynsha zeınetaqy alý quqyǵy qalpyna keltirilmek. Zań jobasynda barlyq qarajat talap etetin normalar boıynsha respýblıkalyq bıýdjet komıssııasynyń oń qorytyndysy bar. Árıne, bıýdjet shyǵyndaryn qajet etetin kóptegen másele bar. Biraq olar ázirge oń sheshim tapqan joq», - dedi Bas prokýrordyń orynbasary.

Budan buryn habarlanǵandaı, quqyq qorǵaý organdaryna qyzmetke qabyldaýda jańa ózgerister engizilip otyr.

Sonymen qatar, zań jobasy aıasynda quqyq qorǵaý organdary oqý oryndarynyń kadrlyq quramy nyǵaıtylady.

Munymen qosa, ataqtardy merziminen buryn berý jáne kezekten tys ataqtar berý tártibi ózgeredi.

«Kótermeleý retinde merziminen buryn ataq-shender berý tártibi kúsheımek. Qazirgi zań boıynsha qyzmetkerlerge kótermeleý arqyly 6 ret ataq-shender berýge bolady. Zań jobasynda kótermeleý arqyly ataqtardy eki-aq ret berý usynylady», - dedi Áset Shyndalıev.