Quqyq qorǵaý organdary Atyraýdaǵy balyqtyń qyrylýyna kinálilerdi anyqtaıdy
ATYRAÝ. QazAqparat - Atyraý oblysy ákiminiń orynbasary Álibek Náýtıevtiń tóraǵalyǵymen óńirde balyqtyń jappaı qyrylýy sebepterin anyqtaý jáne óli balyqtyń óńirdegi bazarlarda satylýyna jol bermeý jóninde vedomstvoaralyq komıssııa otyrysy ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Atyraý oblystyq aýmaqtyq orman sharýashylyǵy jáne janýarlar dúnıesi ınspektsııasynyń basshysy Danııar Baımaǵambetovtiń aıtýynsha, tabıǵatqa keltirilgen shyǵyn kólemi eseptelip jatyr.
«Balyq sharýashylyǵy sýbektilerin tartý arqyly jáne ókiletti organdardyń birlese jumys isteýi nátıjesinde ınspektorlar 4 tonna 165 kg óli balyq jınady. Balyq qoryna keltirilgen zalal 4 mln 200 myń teńge. JEO qyzmetkerleri men ınspektorlardyń Peretaska ózeginen jınaǵan balyq kólemi 1 tonna 304 kg boldy, ıaǵnı 1 mln 254 myń teńge zalal kelgen. Balyq qoryna kelgen zalal týraly anyqtama qylmystyq is materıaldaryna qosý úshin polıtsııa departamentine joldandy», - deıdi Danııar Baımaǵambetov.
Balyq qyrylýyna qatysty derek boıynsha eki qylmystyq is qozǵaldy. Atyraý oblystyq ekologııa departamenti «Atyraý Sý Arnasy» JShS tekserýdi aıaqtady. Atyraý JEO tekserý tobyn daıyndaýda. Taǵy eki nysanda, bekire balyq ósirý zaýyttarynda tekserý júrgiziledi.
Bastysy, vedomstvoaralyq komıssııa otyrysyna shaqyrylǵan qoǵamdyq uıymdar men BAQ ókilderin balyqtyń nelikten qyrylǵany jáne sý men balyqtyń tazalyǵy máselesi alańdatty. Otyrysta aıtylǵandaı, balyq óle bastaǵan ýaqyttan beri alynǵan barlyq synamalar zerthanalyq tekserýge baǵyttalǵan. Naqty sebepti anyqtaý úshin ýaqyt kerek.
«Búginge deıin Jaıyq ózeniniń ár tusynan 69 synama aldyq. Sýda eshqandaı aýytqýshylyq tirkelmegenin senimdi túrde aıtamyz. «Atyraý Sý arnasynyń» tazartý qondyrǵylarynan da sý synamasy alyndy. Sanıtarlyq normadan aýytqý bolǵan joq», - dedi óńirlik Qoǵamdyq densaýlyq saqtaý departamenti basshysynyń orynbasary Amantaı Jumaǵalıev.
Jınalysta Jaıyq ózenindegi jáne «Atyraý Sý arnasy» tazartý qondyrǵysyndaǵy sý sapasyna turaqty túrde monıtorıng júrgizý týraly usynys aıtyldy. Bul jurtshylyqty sýdyń qaýipsizdigi týraly aqparattandyrýǵa múmkindik beredi. Veterınarlyq qyzmet pen polıtsııa ókilderi bazarlardaǵy balyq ónimderin baqylaýǵa reıd júrgizý boıynsha jasalǵan jumystardy aıtty. Bul jumystar kúndelikti júrgizilýde jáne zerthana synamalary satylymdaǵy ónimderdiń qaýipsizdigin kórsetip otyr.
«Bazardaǵy barlyq balyq ónimderi sertıfıkattalǵan. Baqylaý jasalady. Ólgennen keıin jınalǵan balyqtar satylyp jatyr deýge esh negiz joq. Balyq aýlaý maýsymynda óndiristik kooperatıvterdiń aýlaǵan ónimderi. Aýlanǵan balyqtyń bir bóligi óńdeledi de saýdaǵa shyǵarylady, kelesi bóligi muzdatylady, sondyqtan turǵyndardyń balyq ónimderiniń sapasyna alańdaýyna bolady», - dep atap ótti Álibek Náýtıev.
Onyń aıtýynsha, oblys ákimi Nurlan Noǵaevtyń tapsyrmasymen Jaıyq-Kaspıı basseıniniń saǵasyn zertteý jumystary júrgiziledi. Turǵyndardyń Kaspııdegi jaǵdaıǵa alańdaýy jergilikti atqarýshy bıliktiń baqylaýynda.
«Ázirge aýa-raıy teńiz bóligin zertteýge múmkindik bermeı otyr. Biz biraq Jaıyq ózeniniń jaǵdaıyn baqylaýda ustaı beremiz. Balyqtyń qyrylýyn tekserý máselesi jurtshylyqqa ashyq aıtylatyn bolady. Buryn da aıtylǵandaı, balyq ólimine qatysty eki qylmystyq is qozǵaldy, onymen quqyq qorǵaý organdary aınalysyp jatyr. Sotqa deıingi tergeý-tekserý jumystary júrip jatyr, sol aıaqtalmaıynsha eshkimdi kinálaı almaımyz. Kóptegen saýaldarǵa jaýap beretin osy tergeýlerdiń aıaqtalýyn kútemiz. Ázirge kún saıyn monıtorıng júrgizip, halyqty Jaıyq ózeni sý basseıniniń jaǵdaıy týraly aqparattandyryp otyramyz. Bastysy - qazir balyq óliminiń jańa derekteri tirkelgen joq», - dep qortyndylady Álibek Náýtıev. 
