Quqyq qorǵaý qyzmetkerleriniń esirtkimen kúreske baǵyttalǵan sharalaryna joǵary oqý oryndarynyń stýdentteri de atsalysýda
ASTANA. Qarashanyń 17-si. QazAqparat /Aıdar Ospanalıev/ - Astana qalalyq Іshki ister departamentiniń qyzmetkerleri ákimshilik sot organymen birlese otyryp, kóshpeli sot otyrystaryn uıymdastyrýdy jalǵastyrýda.
Qarashanyń 12-si kúni jastar arasyndaǵy quqyqbuzýshylyq pen esirtki paıdalaný jáne ishkilikke salynýdyń aldyn alý maqsatynda Eýrazııa ulttyq ýnıversıtetinde prokýratýra qyzmetkerleri men 200-den astam stýdent jastardyń qatysýymen osyndaı kóshpeli otyrys ótti, dep habarlaıdy QazAqparat.
Astana qalalyq Іshki ister departamenti bastyǵynyń orynbasary Qaırat Muhıtovtyń sózine qaraǵanda, qarashanyń 4-i kúni ýchaskelik polıtsııa ınspektory G.Qutemgenov pen atalmysh joǵary oqý ornynyń jedel-jastar otrıadynyń ókilderi 1989 jyly týylǵan J. atty azamatty qolǵa túsirip, tekserý sharalary nátıjesinde odan tabylǵan esirtkige uqsas zattyń gashısh ekendigi anyqtaldy. «Sot talqylaýy barysynda atalmysh azamattyń esirtkiniń dámin tatyp kórgendigi jáne onyń ózi de bul faktini rastap, esirtkini jeke ózi paıdalaný úshin alyp júrgendigin málim etti. Atalmysh azamattyń kinási dáleldenip, oǵan 4 aılyq eseptik kórsetkish kóleminde aıyppul salyndy. Al jedel-jastar uıymynyń ókilderiniń árqaısysyna 10 myń teńge kóleminde syıaqy usynylyp, uıymǵa jańadan múshe bolǵan azamattarǵa arnaıy kýálikter tapsyryldy», dedi departament bastyǵynyń orynbasary.
Esterińizge sala keteıik, joǵary oqý oryndarynyń jedel-jastar otrıadynyń ókilderi qarashanyń 1-i men 25-i aralyǵynda ótetin slet aıasynda quyq qorǵaý qurylymdarymen birlesip jumys isteıdi. Slettiń nátıjesin, ıaǵnı úzdik jedel-jastar uıymynyń jumysyn arnaıy konkýrstyq komıssııa anyqtaıtyn bolady.
