Quqyq qorǵaý qyzmetine kirý tártibi ózgerdi

NUR-SULTAN. QazAqparat - Endi prokýratýra, sybaılas jemqorlyqqa qarsy qyzmet jáne ekonomıkalyq tergeý qyzmetine qyzmetke túskisi keletinder mindetti bastapqy kásibı daıarlyqtan ótýi tıis, dep habarlaıdy QazAqparat QR bas prokýratýrasynyń janyndaǵy quqyq qorǵaý organdary akademııasynyń resmı saıtyna silteme jasap.

Jańa engizilimder quqyq qorǵaý qyzmetine qatardaǵy, kishi jáne orta basshy quram laýazymdaryna birinshi ret qabyldanatyn adamdarǵa qatysty.

Qazaqstan Respýblıkasy Prezıdentiniń 2020 jylǵy 13 mamyrdaǵy Jarlyǵymen Bas prokýratýranyń janyndaǵy Quqyq qorǵaý organdary akademııasyna atalǵan kásiptik daıarlyqty ótkizý jónindegi fýnktsııalar júktelgen.

Prokýratýra organdaryna qyzmetke kirý úshin oqý merzimi 1 jyl, sybaılas jemqorlyqqa qarsy qyzmet jáne ekonomıkalyq tergeý qyzmetine 6 aıdy quraıdy. ​

Joǵary zańgerlik bilimi bar otyz bes jastan aspaǵan úmitkerler qabyldanatyn bolady.

Barlyq túskender memleket esebinen stıpendııamen, tamaqpen jáne turatyn orynmen qamtamasyz etiledi.

Oqýǵa túsý úshin aldyn ala Memlekettik qyzmet isteri agenttiginde testileýden (quqyq qorǵaý qyzmetine kirý úshin), áskerı-dárigerlik komıssııalarda medıtsınalyq jáne psıhofızıologııalyq kýálandyrýdan jáne polıgrafologııalyq zertteýden, sondaı-aq Akademııada irikteýden ótý qajet.

Bastapqy kásiptik daıarlyqqa túsý, Akademııaǵa irikteý tártibi men merzimderi týraly tolyq aqparat Quqyq qorǵaý organdarynyń jáne Akademııanyń vedomstvolyq saıttarynda qosymsha jarııalanatyn bolady.