Quqyq buzýshynyń kesirinen polıtseı aýrýhanaǵa tústi - Pavlodar
PAVLODAR. QazAqparat - Pavlodar qalasyna qarasty Pavlodarskoe aýylynda polıtseılerdiń talabyna qulaq aspaǵan quqyq buzýshy tipti tártip saqshysynyń birin jaralap tyndy. Aşy sýdyń kesirinen quqyq buzýshy aqyry ýaqytsha oqshaýlaǵyshqa qamaldy, dep habarlaıdy QazAqparat tilshisi.
Pavlodar ІІD-niń VKontakte jelisindegi aqparatqa súıensek, tamyzdyń keshinde Pavlodarskoe aýylynyń ýchaskelik polıtsııa pýnktine 38 jastaǵy jergilikti turǵyn óziniń jubaıy ata-anasy turatyn úıde mas kúıde shý shyǵarǵanyn aıtyp kelgen. Quqyq buzýshy týystaryn mazalap, tipti jıhazdy qıratyp jáne kúsh kórsetken. Janjaldasqan otaǵasyn tynyshtandyrýǵa ýchaskelik polıtsııa ınspektory polıtsııa kapıtany Madııar Tursynbaev jáne onyń kómekshisi polıtsııa kapıtany Baýyrjan Asylbekov kelgen. Olar oqıǵa ornynda mas kúıdegi er adamdy kórgen.
«Ýchaskelik ınspektorlarynyń birge bólimshege barý usynysyna qarsy shyǵyp, (quqyq buzýshy - avt.) olarǵa judyryq ala júgiredi. Munyń aqyry sońynda polıtsııa ınspektory Madııar Tursynbaev sol jaq ıyǵy shyǵyp ketip aýrýhanaǵa jatqyzyldy», - delingen habarlamada.
Atalǵan fakt boıynsha QR QK 380-baby (bılik ókilderine qatysty kúsh kórsetý) boıynsha sotqa deıingi tergeý júrgizilip jatyr. Quqyq buzýshy qazirgi tańda qamaýda otyr.
