Quqyq buzýshylyqtardyń aldyn alý jónindegi vedomstvoaralyq komıssııanyń otyrysy ótti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen QR Úkimeti janyndaǵy quqyq buzýshylyqtardyń aldyn alý jónindegi Vedomstvoaralyq komıssııanyń (VAK) kezekti otyrysy ótti.
Bul týraly QR Úkimetiniń baspasóz qyzmeti habarlady.
Otyrys barysynda 2017 jylǵa quqyq buzýshylyqtardyń aldyn alý jónindegi óńirlik VAK jumysynyń nátıjeleri talqylandy jáne VAK jumysynyń 2018 jylǵa arnalǵan Josparynyń jobasy maquldandy.
Aıta keteıik, «Quqyq buzýshylyqtardyń aldyn alý týraly» zańǵa sáıkes jergilikti atqarýshy organdar janynan quqyq buzýshylyqtardyń aldyn alý jónindegi Vedomstvoaralyq komıssııalar quryldy jáne jumys jasaıdy, olardyń tóraǵalary oblys jáne aýdan (qala) deńgeıindegi ákimder bolyp tabylady. VAK jumysshy organy - QR ІІM.
ІІM bastamasymen vedomstvoaralyq jumys toby quryldy (quramynda QR ІІM, UEM, DSM jáne EHÁQM ókilderi bar), ol Qostanaı, Qyzylorda jáne Almaty oblystarynyń óńirlik VAK jumysynyń tıimdiligin tekserdi.
Jeke óńirlik komıssııalardyń qyzmetin «100 naqty qadam» Ult Josparyn iske asyrý sapasyn tekserý boıynsha QR Prezıdenti Ákimshiligi janynan qurylǵan jumys toby tekserdi.
Ár óńirde komıssııa quramyna múddeli memlekettik organdardyń basshylary, úkimettik emes uıymdardyń ókilderi, máslıhat depýtattary, al 2016 jyldan bastap jergilikti polıtsııa qyzmetiniń basshylary da endi.
Komıssııa jumysynyń 2018 jylǵa arnalǵan Jospar jobasy memlekettik jáne jergilikti atqarýshy organdardyń quqyq buzýshylyqtardyń aldyn alýdyń 2017-2019 jyldarǵa arnalǵan Keshendi josparyn iske asyrýy máselelerinen, sondaı-aq maskúnemdik, nashaqorlyqtyń aldyn alý boıynsha jumystan jáne quqyq buzýshylyqtardyń aldyn alý sýbektilerimen jumysty odan ári jetildirýden turady.
