Quqyǵy saqtalmaǵan tutynýshylarǵa 5 kúnde 24 mln teńge qaıtaryldy - komıtet

ASTANA. QazAqparat – Bes kún ishinde quqyǵy buzylǵan tutynýshylar tarapynan 582 ótinish túsip, olarǵa 24 mln teńge qaıtaryldy. Bul týraly Saýda jáne ıntegratsııa mınıstrliginiń Tutynýshylardyń quqyqtaryn qorǵaý komıtetinen málim etti, dep habarlaıdy QazAqparat tilshisi.

«Qaıtarylǵan eń kóp soma – 14 mln teńge. Astana qalasynyń turǵyny JShS-niń birinen synǵan avtokólikti satyp alǵan. Tutynýshy avtosalonǵa óz betinshe júgingen kezde olar oǵan kómektese almaıtynyn málimdegen. Keıin satyp alýshy elordalyq departamentke júginip, nátıjesinde tutynýshyǵa aqshasy qaıtaryldy.

Sonymen qatar, departament saqtandyrý kompanııasyna qatysty týyndaǵan taǵy bir tutynýshylyq daýdy sheshti. Jol-kólik oqıǵasy bolyp, tutynýshynyń saqtandyrylǵan kóligine zaqym kelgen. Saqtandyrý kompanııasy zııandy qalpyna keltirý úshin somany tóleýden bas tartady. Departamenttiń suraýynan keıin tutynýshyǵa 827 myń teńge óteldi.

Budan bólek, Tutynýshylardyń quqyqtaryn qorǵaý komıteti departamentiniń kómegimen Túrkistan oblysynyń turǵynyna sapasyz plastıkalyq terezeler úshin 1 mln teńgege jýyq qarajat qaıtaryldy.

Kóbine tutynýshylar sapasyz taýardy aıyrbastaýdan bas tartady. Máselen, Aqtóbe oblysynda satýshy aqaýly uıaly telefon úshin aqshany tutynýshyǵa qaıtarmaıdy. Jergilikti departamentke shaǵymnan keıin, tutynýshyǵa quny 400 myń teńge bolatyn telefon aıyrbastaldy», - dep málim etti vedomstvonyń baspasóz qyzmetinen.

Munymen qosa, elimizdiń 8 oblysynda sapasyz taýarlardy satyp, ony aıyrbastaýdan bas tartqan satýshylar tutynýshylarǵa jalpy somasy 1,3 mln teńge bolatyn qarajatty qaıtarǵan.