«Quqyqtyq tártip»: Úsh kúnde izdeýde júrgen 12 adam ustaldy

ASTANA. KAZINFORM — Kóliktegi Polıtsııa departamentinde «Quqyqtyq tártip» is-sharasy qorytyndylandy, dep habarlaıdy Polisia.kz.

Qoǵamdyq qaýipsizdikti nyǵaıtý jáne kólik ınfraqurylymy nysandarynda quqyq buzýshylyqtardyń aldyn alý maqsatynda osy jyldyń 11–13 jeltoqsan aralyǵynda kóliktegi polıtsııa departamenti respýblıkalyq «Quqyqtyq tártip» jedel-profılaktıkalyq is-sharasyn ótkizdi. Úsh kúnde 1200-den astam quqyq buzýshylyq anyqtaldy. 

Shara barysynda kólik polıtseıleri 13 qylmys pen qylmystyq teris qylyqty tirkedi. Olardyń 12-i «izin sýytpaı» ashyldy. Jedel-izdestirý sharalary aıasynda izdeýde júrgen 12 adam ustaldy.

— Іs-shara kezinde ákimshilik quqyq buzýshylyqtardy anyqtaý jáne jolyn kesýge erekshe nazar aýdaryldy. Nátıjesinde 1245 azamat jaýapkershilikke tartyldy. Eń kóp tirkelgen quqyq buzýshylyqtar: qoǵamdyq oryndarda tıisý — 108 fakti, sondaı-aq alkogoldik ishimdikterdi ishý jáne qoǵamdyq oryndarǵa mas kúıinde kelý — 96 fakti. Sonymen qatar túngi ýaqytta kólik nysandarynda zańdy ókilderiniń erip júrýinsiz 24 kámeletke tolmaǵan anyqtaldy. Olardyń 14-i kámeletke tolmaǵandardy beıimdeý ortalyǵyna ornalastyryldy. Sondaı-aq kóshi-qon zańnamasyn buzý derekteri de anyqtalyp, 49 shetel azamaty ákimshilik jaýapkershilikke tartyldy, — delingen aqparatta. 

Qaýipsizdik sharalaryn kúsheıtý maqsatynda profılaktıkalyq sharany ótkizýge kınologııalyq qyzmet ortalyǵynyń qyzmetkerleri tartylyp, qyzmettik-izdestirý ıtterimen jedel qyzmet kórsetý aýmaqtarynda patrýldeý júrgizdi. Kóliktegi polıtsııa departamenti kólik nysandarynda quqyqtyq tártip pen azamattardyń qaýipsizdigin qamtamasyz etý baǵytyndaǵy jumysty jalǵastyra beredi.

Buǵan deıin Qaraǵandy oblysynda quqyq buzýshylyqtardyń aldyn alatyn QR-kod jobasy iske qosylǵany týraly jazdyq.