«Quqyqtyq dárihana»: SQO-da turǵyndarǵa tegin quqyqtyq kómek bergen erekshe aktsııa ótti
PETROPAVL. KAZINFORM – Soltústik Qazaqstan oblysynda turǵyndar aldyn ala jazylýsyz jáne tegin zańdyq kómek alýǵa múmkindik aldy.
«Quqyqtyq dárihana» dep atalǵan aktsııanyń ótetini týraly aldyn ala habarlandyrý berildi. Sondyqtan da bolar, zańgerlermen kezdesýge kelgenderdiń qarasy qalyń boldy. Іs-shara bir ýaqytta Petropavldaǵy iri saýda oryndarynda, oıyn-saýyq ortalyqtarynda jáne aýdandarda adam kóp júretin Halyqqa qyzmet kórsetý ortalyqtarynda, aýdandyq aýrýhanalarda, Mádenıet úılerinde uıymdastyryldy.
SQO prokýratýrasynyń málimetinshe, oblystyń 250-ge jýyq turǵyny áleýmettik qamsyzdandyrý, otbasy, eńbek, turǵyn úı, salyq jáne jer zańnamasyna qatysty ózekti suraǵyna jaýap aldy.
Máselen, aktsııa kezinde turǵyndardyń biri jeke sot oryndaýshysy salǵan aıyppuldy ýaqytynda tólegenine qaramastan, bank shotyn buǵattan shyǵarmaǵanyn aıtyp shaǵymdandy. Saldarynan ol eki aı boıy eńbekaqysyn ala almaǵan. Prokýratýra qyzmetkerleri nebári 15 mınýt ishinde shottaǵy tyıymdy alyp tastady.
Al qoǵamdyq birlestik ókili qylmystyq istiń sapasyz tergelýine shaǵym túsirdi. Bul másele oblys prokýrorynyń birinshi orynbasarynyń jeke baqylaýyna alynyp, jaýaptylarǵa naqty tapsyrmalar berildi.
Uıymdastyrýshylardyń aıtýynsha, bul aktsııa endi ár seısenbi saıyn dástúrli túrde ótedi. Maqsat - óńir turǵyndaryna quqyqtyq kómekti barynsha qoljetimdi etý, qabyldaýǵa aldyn ala jazylýsyz kelip, jedel kómek alýǵa jaǵdaı jasaý.
Buǵan deıin almatylyqtar tegin quqyqtyq kómek alatyn joba iske qosylatynyn jazǵan edik.
