Quqyq qorǵaýshy – shekpen emes, ar kıetin adam - Bıbigúl Jeksenbaı
ASTANA. KAZINFORM – Senat depýtaty, Bıbigúl Jeksenbaı Memleket basshysy Qasym-Jomart Toqaevtyń quqyq qorǵaý organdarynyń keńeıtilgen alqa májilisindegi sózine qatysty pikir bildirdi.
- Qazaqstannyń eń basty baılyǵy – tynyshtyq. Al tynyshtyqty kúzetip júrgender – polıtsııa men quqyq qorǵaý qyzmetkerleri. Polıtseıler - qaýipsizdik kúzetinde júrgen qaısarlar. Prezıdent polıtsııa qyzmetkerlerin kásibı merekelerimen quttyqtady. Bul – qurǵaq maqtaý men marapat úshin emes, qurmet pen senimniń belgisi. Sebebi olar – el ishinde bolyp jatqan tynysh ómirdiń kúzetshileri. Al sol tynyshtyq kezdeısoq kelgen joq. Otyz jylda júzdegen polıtsııa qyzmet babynda mert boldy, myńdaǵan quqyq qorǵaýshy jaraqat aldy. Esesine, elde qylmystyq quqyq buzýshylyqtar sany tek 2019 jyldan beri 2 ese azaıypty. Tonaý men qaraqshylyq – 4 ese, kisi óltirý – 30%, qoǵamdyq oryndardaǵy qylmys 80% azaıǵan. Bul – bir kúnniń jumysy emes. Bul – beıbit kún maıdanyndaǵy kórinbeıtin kúrestiń jemisi. Memleket basshysy Qasym-Jomart Toqaev: «Zań men tártip ústemdigin túbegeıli ornyqtyrý – barsha azamattyń quqyǵyn qorǵaýdyń negizi», – dedi. Bul bos sóz emes. Bul – Memleket basshysynyń ustanymy, - dedi B. Jeksenbaı.
Sonymen qatar senator qazaq qoǵamynda áıel men bala álsizdigin emes, úlken qamqorlyqty sezinetindeı jaǵdaıda bolýy kerek ekenin atap ótti.
- Jaza qataıdy. Bir jylda qabyldanǵan zańnyń nátıjesinde otbasylyq qylmys 30 paıyzǵa azaıdy. Bul – qanshama eńsesi ezilgen ananyń kúrsinisi men qanshama balanyń kóz jasy tyıyldy degen sóz. Bul – jaqsylyqtyń basy. «Qazaqstan balalary» arnaıy baǵdarlamasy – urpaqqa qamqorlyqtyń jańa kezeńi. Biz urpaqty qorǵamasaq, keleshek te qorǵansyz qalady. Nashaqorlyq – jas urpaqtyń jaýy, ult kelesheginiń qurty. 2025 jyldyń ózinde 83 esirtki zerthanasy joıylǵan. Esirtki óndirýshige ómir boıyna bas bostandyǵynan aıyrý jazasy belgilendi. Biraq másele jazada emes, jastardy saqtap qalýda, - dedi depýtat.
Sonymen qatar senator kóleńkeli ekonomıkaǵa qatysty pikir aıtty. 2019 jyldan beri kóleńkeli ekonomıka JІÓ-niń 23%-nan 16%-na deıin azaıdy. Bul – zańdy bızneske jol ashý, adal kásipkerdi qorǵaý. Endi saıası júıedegi jańa tásilder osy ádilettikti tereńdetýi kerek.
- Qasym-Jomart Toqaevtyń aıtýynsha, tártip – jalpyǵa ortaq qundylyqqa, al zańǵa baǵyný – árkimniń ómir saltyna aınalýǵa tıis. Shyndyq osy. Tártip bolmasa – táýelsizdik baıansyz. Tártip bolmasa – ekonomıka tozady. Tártip bolmasa – adam taǵdyry tálkekke túsedi, namysy taptalady. Sondyqtan tártip – endi trend. Bul – uran, nasıhat qana emes, ár sanaly azamattyń urpaqqa kórseter úlgisi. Zańsyzdyqpen kúres tek jazalaý arqyly emes – onyń aldyn alý arqyly bolýy kerek. Prezıdent «Quqyq buzýshylyqtyń aldyn alý týraly» arnaıy zańdy jyl sońyna deıin qabyldaýdy tapsyrdy. Bul – tek qylmyspen kúresý emes, onyń aldyn alýǵa bet burý. Polıtsııany jazalaýshy emes, keńesshi, qorǵaýshy-qamqorshy retinde kórý – jańa ustanym. Tsıfrlandyrý – quqyq qorǵaýdyń quraly. Jańa zaman – tsıfrlyq quralmen qylmystyń aldyn alý zamany, - dedi Bıbigúl Jeksenbaı.
Depýtat mektepterde tárbıelik jumysty kúsheıtý taqyrybyna da toqtaldy.
- Biz urpaqqa fızıka men algebrany ǵana emes, adaldyqty, zańǵa qurmetti úıretýimiz kerek. Shyn ult – zańdy syılaıtyn qoǵamnan bastalady. Quqyq qorǵaýshy – shekpen emes, ar kıetin adam. Zań men tártip – bılikke emes, halyqqa qyzmet etý joly. Tártip bolǵan jerde ádilet bolady. Ádilet bolǵan jerde – senim, al senim – ulttyń tiregi. Qazaqstan – zań ústemdigi ornaǵan, tártipti, qaýipsiz memleket bolýy tıis. Búgin sol joldaǵy árbir qadam – erteńgi urpaq úshin irgetas, - dedi ol.
Budan buryn habarlanǵandaı, quqyq qorǵaý organdarynyń keńeıtilgen alqa májilisinde Prezıdent elimizde «Zań men tártiptiń» qatań saqtalýyna qoǵam ókilderiniń qosar úlesi de orasan zor ekenin atap ótti.
Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde ádiletti ári qaýipsiz Qazaqstandy qurý úshin zań men tártip ústemdigin túbegeıli ornyqtyrý kerek ekenin aıtty.