Quqyq qorǵaý organdarynda JI engizý protsesi qalaı júrip jatyr

ASTANA. KAZINFORM – Qazir kóptegen salaǵa jasandy ıntellekt engizilip jatyr. Búgin Senat qabyrǵasynda JI-di quqyq qorǵaý organdary men sot júıesine engizý máselesi qaraldy.

– Elektrondyq istiń artyqshylyǵy basym. Bul degenimiz qylmysty, tergeý nátıjeleri jáne barlyq kináli tulǵany jaýapkershilikke tartý týraly derekterdi jınaýdy avtomattandyrý jáne jedeldetý, sybaılas jemqorlyqqa qatysty jalǵan málimdeme jasaý táýekelin boldyrmaý, – dedi Bas prokýratýranyń quqyqtyq statıstıka jáne arnaıy esepke alý komıtetiniń aqparattandyrý, tsıfrlandyrý jáne aqparattyq resýrstardy qorǵaý basqarmasynyń bastyǵy Qadyrjan Jarkenov jıyn barysynda.

Bas prokýratýra ókiliniń aıtýynsha, elektrondyq qujattardyń úlgilerin avtomatty túrde qalyptastyrý arqyly protsessýaldyq qujattardy ázirleý jáne kelisý rásimderi edáýir jeńildegen.

- Sot saraptamalaryn taǵaıyndaý jáne olardyń nátıjelerin alý da qazir elektrondyq formatta júzege asyrylady. Advokattar «Zań kómegi» júıesimen ıntegratsııa arqyly avtomatty túrde taǵaıyndalady. Protseske qatysýshylar EQDB ashyq sektory arqyly protsessýaldyq qujattardyń kóshirmelerin ala alady. Sonymen qatar, quqyqtyq jáne qylmystyq statıstıkanyń tolyqtyǵy, obektıvtiligi men shynaıylyǵy qamtamasyz etiledi, – deıdi ol.

Sondaı-aq maman búginde qylmystyq protsestiń tirkeýden bastap prokýrorlyq qadaǵalaýǵa deıingi negizgi kezeńderi tolyq tsıfrlyq formatqa aýystyrylǵanyn aıtty.

– 2018 jyldyń basynda elektrondyq formatta tergeletin qylmystyq isterdiń úlesi 5% bolsa, 2024 jyldyń sońynda jáne bıylǵy 4 aıdyń qorytyndysy boıynsha kórsetkish 95%-ǵa jetti, – dep tolyqtyrdy Q.Jarkenov.

Búgin Senattyń Konstıtýtsııalyq zańnama, sot júıesi jáne quqyq qorǵaý organdary jónindegi komıtetinde «Jasandy ıntellekt: onyń tehnologııalaryn quqyq qorǵaý jáne sot qyzmetine engizý jáne qoldaný» taqyrybynda dóńgelek ústel ótti. Jıynǵa Senat depýtattary, quzyrly organdardyń ókilderi men sala mamandary qatysty.

Buǵan deıin Senat depýtaty Nurlan Beknazarov jasandy ıntellektini engizýde adamnyń quqyǵy men jeke derekteri qatań saqtalýy kerektigin aıtqan edi. 

Aıta keteıik, búgin Májilis jasandy ıntellekt týraly úsh zańnyń jobasyn maquldady.