Quqyq qorǵaý organdarynda laýazymdy tulǵalar polıgrafologııalyq tekserýden ótedi

ASTANA. KAZINFORM – Bas prokýratýra quqyq qorǵaý, azamattyq qorǵaý organdary men memlekettik feldegerlik qyzmette polıgrafologııalyq zertteýden ótý erejesine ózgerister engizdi. Qujat jobasy «Ashyq NQA» portalynda jarııalandy.

Polıgrafologııalyq zertteý – adamnyń jekelegen fızıologııalyq reaktsııalaryn arnaıy datchıkterdiń kómegimen tirkeýden turatyn saýalnama júrgizý rásimi. 

Jańa ózgeristerge sáıkes, Qazaqstan Respýblıkasy quqyq qorǵaý organdarynyń, azamattyq qorǵaý organdarynyń, memlekettik feldegerlik qyzmetiniń qyzmetkerleri joǵary turǵan basshy laýazymǵa usynylǵan kezde (attestattaý nemese jospardan tys attestattaý nemese joǵary turǵan basshy laýazymǵa konkýrs sheńberinde) ótedi.

Zertteý joǵary laýazymǵa usynylǵan adamnyń kelisimimen júrgiziledi.

Sondaı-aq Bas prokýratýra polıgrafologııalyq zertteýden ótýdiń mindetterin túsindirdi.

- Laýazymdy qyzmettegi jasyryn teris sebepterin (tyıym salynǵan qoǵamdyq birlestikter qyzmetiniń, qylmystyq jáne terrorıstik uıymdar múddelerine jáne basqalary), jaǵymsyz táýeldiligin, esirtki, psıhotroptyq, psıhıkalyq jáne fızıkalyq táýeldilik týǵyzatyn ózge de psıhoaktıvti zattardy tutyný tutynbaýyn anyqtaý. Sonymen qatar qyzmet atqarýǵa kedergi keltiretin jasyryn syrqattaryn, óz-ózine qol jumsaýǵa beıimdigin, tabysy týraly, múlki jáne múliktik sıpattaǵy mindettemeleri, qos azamattyǵynyń bar bolýy týraly málimetterdi jasyrýyn nemese burmalaýyn anyqtaý mindetin kózdeıdi, - delingen qujatta. 

Odan bólek, laýazymdy tulǵanyń sybaılas jemqorlyq quqyq buzýshylyq jasaýynyń, bógde adamdarǵa qupııa nemese qyzmettik aqparat berýiniń faktileri tekseriledi. 

- Qylmystyq, sybaılas jemqorlyq quqyq buzýshylyqtar jasaǵany úshin jaýapqa tartylý faktileri, tyıym salynǵan qoǵamdyq birlestiktermen, qylmystyq jáne terrorıstik uıymdarmen qatynas jasaýyn nemese eger bul buryn olardyń qyzmettik mindettemelerine kirmegen bolsa, kommertsııalyq qurylymdarǵa qatysýyn, qyzmettik ókilettigin teris paıdalaný faktilerin anyqtaý, - delingen Bas prokýratýra habarlamasynda. 

Eske sala ketsek, Senat byltyr jeltoqsanda quqyq qorǵaý organdaryndaǵy taǵaıyndaýǵa qatysty, jospardan tys polıgrafologııalyq tekserý engizý týraly zańdy maquldady.