Quqyq qorǵaý mártebesi bar derbes Keden qyzmeti qalpyna keltirile me – Bektenov jaýaby

ASTANA. KAZINFORM – Premer-mınıstr Oljas Bektenov Senat depýtattarynyń quqyq qorǵaý mártebesi bar derbes Keden qyzmeti qalpyna keltirýge qatysty saýalyna jaýap berdi.

- Búgingi tańda Úkimet keden júıesiniń ashyqtyǵyn arttyrýǵa, tsıfrlandyrýǵa jáne kásibılendirýge, bıýdjettiń tolyǵyp turýyn qamtamasyz etýge jáne memlekettiń ekonomıkalyq múddelerin qorǵaýǵa baǵyttalǵan júıeli saıasat júrgizip jatyr. Jazylǵandardy eskere otyryp, quqyq qorǵaý mártebesi bar derbes Keden qyzmetin qalpyna keltirý máselesi qazirgi ýaqytta basymdyq retinde qarastyrylmaıdy. Óıtkeni memlekettik kirister organdarynyń qazirgi qurylymy ekonomıkalyq qaýipsizdikti qamtamasyz etý, baqylaý jáne halyqaralyq ózara is-qımyl jónindegi mindetterdi tıimdi oryndaýǵa múmkindik beredi, - dedi Úkimet basshysy.

Sonymen qatar Oljas Bektenov Úkimet protsesterdi odan ári jetildirýge, kadrlyq áleýetti nyǵaıtýǵa jáne halyqaralyq yntymaqtastyqty damytýǵa baǵyttalǵan kedendik ákimshilendirý salasyndaǵy reformalardy iske asyrýdy jalǵastyratyndyǵyna nazar aýdartady.

Buǵan deıin Premer-mınıstrdiń orynbasary — Ulttyq ekonomıka mınıstri Serik Jumanǵarın keden qyzmetiniń qadaǵalaý fýnktsııasyn keńeıtýge Bas prokýratýra qarsy bolyp otyrǵanyn aıtqan edi.