Qýyrshaq teatrynda «Orman ǵajaıyptary» qoıylymynyń premerasy ótti
ALMATY. KAZINFORM — Ulttyq kitap kúni merekesi aıasynda Almaty qalasynyń memlekettik qýyrshaq teatrynda «Orman ǵajaıyptary» qoıylymy sahnalandy.
Qýyrshaq teatrynyń ujymy kórermenderge belgili nemis jazýshysy Otfrıd Proıslerdiń «Kishkentaı sıqyrshy» povesi jelisimen sahnalanǵan «Orman ǵajaıyptary» spektaklin usyndy.
Qoıylym rejısseri Anton Zaıtsevtyń sózinshe, balalar ádebıetiniń altyn qorynan oryn alǵan bul shyǵarma – jaqsylyq pen zulymdyq, batyldyq pen meıirim, adaldyq pen izgilik taqyryptaryn qozǵaıtyn oıly týyndy. Ertegi keıipkerleriniń sahnaǵa shyǵýy – kitapqa degen súıispenshilikti jańa deńgeıge kóterýdiń jarqyn úlgisi boldy.
«Orman ǵajaıyptary» qoıylymynyń oqıǵa jelisi kóne kitaphana ishinde órbıdi. Bir qaraǵanda shań basqan, umyt qalǵan tomdar. Alaıda dál osy tynysh ári tylsym keńistikte sheksiz qııalǵa jol ashatyn sıqyrly álem bastalady. Bul jaı ǵana oqıǵa emes – bul ertegiler álemine ashylǵan esik, ár paraǵy jumbaq pen ǵajaıypqa toly kitaptardyń álemine saıahat.
Qoıylymnyń basty ıdeıasy – balalardy kitap oqýǵa baýlý, olardyń boıynda oqý mádenıetine degen qyzyǵýshylyqty oıatý. Sahnadaǵy oqıǵalar arqyly kitaptyń tek qaǵaz ben áripter jıyntyǵy emes, naǵyz tiri keıipkerlerge toly sıqyrly dúnıe ekenin kórsetý kózdelgen.
— Ulttyq kitap kúni – bul rýhanı baılyqqa bas ıetin, ádebıettiń qudiretin dáripteıtin erekshe kún. Memlekettik qýyrshaq teatry bul merekeni kitap pen teatr arasyndaǵy altyn kópirdi jalǵaý arqyly atap ótýdi jón kórdi, - deıdi Memlekettik qýyrshaq teatrynyń dırektory Almat Amangeldi.
Sondaı-aq Almaty qalasynyń ortalyqtandyrylǵan kitaphanalar júıesimen birlesip, teatr foıesinde balalarǵa arnalǵan kitap kórmesi uıymdastyryldy.
Aıta keteıik, elimizdegi oqyrmany eń kóp 100 kitap anyqtalatyn boldy.