Qýyǵy tesilip, jatyrynan aıyrylǵan: qyzylordalyq ana dárigerlerdiń jaýap berýin talap etti

Jalaǵash aýdanynyń 30 jastaǵy turǵyny bıyl 18 sáýir kúni júktiliktiń 38-aptasynda qan qysymy kóterilip, ishi aýyryp, josparly túrde Qyzylorda qalasyndaǵy Ana men bala ortalyǵyna joldanǵan. Patsıentke birqatar dıagnoz qoıylyp, qaǵanaq sýynyń erte ketýine baılanysty 20 sáýirde bosanýdyń birinshi kezeńi bastalǵan. Dárigerler dári arqyly tolǵaq shaqyrýǵa tyrysqanymen uryqtyń qaýipti kúıi kúsheıip, kóp uzamaı kesar tiligi jasalady. Sátin salyp, qyz bala dúnıege keledi.

- 6 mamyr kúni qyzymmen birge úıge shyqtym. Alaıda qýanyshym uzaqqa sozylmady. Úıge kelgen soń jynys múshemnen qandy sý aǵyp, kishi dáretke múldem shyǵa almaı qaldym. Jaǵdaıym ábden ýshyǵyp, úsh kúnnen keıin aýdandyq aýrýhanaǵa júgindim. Ol jaqta bir apta, úıge kelgen soń taǵy bir apta boıy tek katetermen júrýge májbúr boldym. Naqty jaǵdaıdy bilý úshin 12 mamyrda MRT apparatyna tústim. Tekserý qorytyndysynda «jatyrdy qynapústilik ampýtatsııalaýdan keıingi kúı, qýyq-qynaptyq jylanqóz belgileri, kishi jambas shelmaıynyń ınfıltratsııasy, emfızematozdy tsıstıt» dep jazylǵan. Osyǵan baılanysty 18 mamyrda Ana men bala ortalyǵynan shyqqan kezde dárigerler maǵan 3 aıdan keıin josparly ota jasatý kerektigin aıtty. Belgilengen ýaqytta, ıaǵnı 3 tamyzda portal arqyly klınıkaǵa bardym. Kelesi kúni maǵan narkozben tsıstoskopııa jasalyp, kólemi 0,5h0,7 sm bolatyn qýyq-qynaptyq jylanqóz anyqtaldy. Olar meni Qyzylorda qalasyndaǵy kópbeıindi aýrýhananyń ýrologııa bólimine josparly otaǵa jiberdi. Alaıda 14 qyrkúıekte oblystyq medıtsına ortalyǵynyń ýrologııa bólimshesine barǵanymda jergilikti dárigerler ota jasaýdan úzildi-kesildi bas tartty. Olar «bul – tesilgen qýyq, óte qaýipti ári iri kólemde, biz buǵan ota jasaı almaımyz» degendi alǵa tartty, - dedi jábirlenýshi.

Jas kelinshektiń týystary onyń oıda joqta músápir kúıge túskenin aq halattylardyń salǵyrttyǵynan dep esepteıdi.

- Sińlim bes aı buryn Ana men bala ortalyǵynda úshinshi balasyn bosanýǵa josparly túrde jatqyzylǵan bolatyn. Jasandy tolǵaq pen kesar tiligi arqyly bosandy. Erteńine qyzýy kóterilgen, biraq dárigerler muny «qalypty jaǵdaı» dedi. Eki kúnnen soń aıaqasty jatyryn alyp tastaǵan. Sol aralyqta qýyǵy tesilgen, ony aıtpaıdy. Úıine kelse, dáretke shyǵa almaıdy. Sińlimniń ortalyqta aılap jatqany azdaı, bes aıdan beri úlkenderge arnalǵan jórgek kııýge májbúr. Jergilikti mamandar tesilgen qýyqty qaýipti ári úlken kólemde bolǵandyqtan tige almaıdy eken. Oblystyq densaýlyq saqtaý basqarmasyna júgingenimizben esh qaıran joq. Іsine nemquraılylyq tanytqan dárigerler áli de óz qyzmetin jalǵastyryp júr. Osyndaı áreket saldarynan qanshama bala anasyz qalsa ne bolady? - dedi Botagóz Baqbergenova.

Qyzylordada ota jasaý múmkin bolmaǵan soń týystary ony jýyrda Almatydaǵy B.Jarbosynov atyndaǵy Ýrologııa ǵylymı ortalyǵyna aparǵan. Alaıda ortalyq qyzmetkerleri patsıenttiń ómirine qaýip tóndiredi degen sebeppen otany keıinge qaldyrypty.

Jábirlenýshi men onyń jaqyndary jaýapty mekemeler men quqyq qorǵaý organdaryna júgingen. Kazinform tilshisi QR DSM Medıtsınalyq jáne farmatsevtıkalyq baqylaý komıtetiniń Qyzylorda oblysy boıynsha departamentine resmı hat joldaǵan bolatyn. Departament qoldanystaǵy normatıvtik quqyqtyq aktilerge sáıkes aryzy boıynsha qazirgi tańda jospardan tys tekserý jumysyn taǵaıyndaýǵa negiz joq ekenin málimdedi. Vedomstvo bul shaǵymdy óz quzyreti sheńberinde qarap, tıisti sheshim qabyldaý úshin oqıǵa bolǵan mekemeniń ózine, ıaǵnı oblystyq perınataldy ortalyqqa baǵyttaǵanyn habarlady.

Patsıent pen onyń týystary oblystyq densaýlyq saqtaý basqarmasy basshysynyń qabyldaýynda bolyp, oblystyq perınataldy ortalyqtyń medıtsına qyzmetkerlerimen kezdesken.

- Kezdesý barysynda olarǵa áıeldiń densaýlyq jaǵdaıy, júrgizilgen em, medıtsınalyq baqylaý nátıjeleri jáne odan ári medıtsınalyq kómek kórsetý taktıkasy boıynsha túsindirý jumysy júrgizildi. Qaraý qorytyndysy boıynsha jaýapty qyzmetkerlerge tıisti tapsyrma berildi, - delingen ortalyqtyń jaýabynda.

Oblystyq densaýlyq saqtaý basqarmasynyń basshylyǵy patsıentti odan ári emdeý máselesin baqylaýǵa aldy.

- Operatsııa ananyń ómirlik kórsetkishterine qaraı jasalǵan. Dárigerler ana men balanyń ómirin saqtap qalýdy maqsat etken. Bul – múmkin bolatyn asqynýlar. Qazirgi kúni patsıentpen baılanysta jumys istep jatyrmyz. Ol ota jasaý úshin respýblıkalyq ortalyqqa joldanǵan bolatyn. Alaıda densaýlyǵyna baılanysty ota ýaqyty shegerildi. Bul jaǵdaı boıynsha tekserý júrip jatyr. Tekserý aıaqtalǵan soń anyǵy belgili bolady, - dedi basqarma basshysynyń ana men bala densaýlyǵyn qorǵaý máseleleri jónindegi orynbasary Maıa Mırzanova.

Uzaqqa sozylǵan aýyr dert pen tán azaby patsıenttiń jan dúnıesin qajytyp, psıhologııalyq turǵydan ony úlken kúızeliske ushyratqan. Mazasyzdyq pen úmitsizdik jas ananyń júıke júıesin tozdyryp, ómirge qushtarlyǵyn múldem tómendetip jiberdi.

- Aıaq-qolym saý, on eki múshem túgel bolyp aýrýhanaǵa barǵanmyn. Aqyr aıaǵynda dárigerlerdiń salǵyrttyǵynan jatyrymdy alyp tastap, tiri ólikke aınaldym. Eshkimge keregi joq múgedek bolyp qaldym. Men áli jaspyn, dúnıege bala ákelgim keledi, biraq ana bolý baqytynan aıyryldym. Sol sebepten meni emdegen, ota jasaǵan dárigerlerdiń is-áreketine quqyqtyq baǵa berý úshin aýrý tarıhymnan bastap tolyq, jan-jaqty jáne obektıvti túrde tekserý jumysyn júrgizip, dárigerler tarapynan maǵan qatysty ota, em jasaý barysynda qandaı da bir óreskel kemshilikterdiń bolǵan-bolmaǵanyn anyqtap, kináli dárigerlerge tıisti shara qoldanýdy suraımyn, - dedi jábirlenýshi.

Eske salaıyq, jýyrda elimizde dárigerlerdiń qateligi úshin aqy tólenetin jańa zań kúshine endi.