Qýǵyn-súrginge ushyraǵan, Germanııada tutqynda bolǵan azamattardyń qujattaryn alýǵa qol jetti
QYZYLORDA. QazAqparat - Qyzylorda oblysynyń Іshki ister departamentine ulttyq qaýipsizdik organynan aqtaýǵa jatpaıtyn adamdardyń muraǵattyq qylmystyq isteri, qýǵyn-súrginge ushyraǵan, sot organdary aqtaǵan tulǵalarǵa qatysty muraǵattyq qylmystyq ister jáne Germanııada áskerı tutqynda bolǵan jáne óz eline qaıta oralǵan burynǵy KSRO azamattaryna qatysty qujattar ótkizildi.
Bul týraly QazAqparat tilshisi oblystyq ІІD-ge silteme jasap habarlady.
Qazirgi ýaqytta Qyzylorda oblysynyń Іshki ister departamenti Aqparattyq-analıtıkalyq ortalyǵynyń Arnaıy memlekettik muraǵatynda jalpy sany alty myńnan asatyn qylmystyq ister saqtalýda.
Saıası repressııa qurbandary týraly aqparatty anaǵurlym qoljetimdi etý maqsatynda Іshki ister mınıstrliginiń veb-portalynda (https://mvd.gov.kz) áleýmettik mańyzy bar «Memorıal» servısi quryldy.
Atalǵan servıste qýǵyn-súrginge ushyraǵan azamattardyń týǵan jyly, turǵylyqty jeri, tutqyndalǵan ýaqyty, sottalǵandyǵy jáne aqtalǵandyǵy jónindegi málimetter engizilgen.
Aqtalǵan azamattar, ne bolmasa olardyń ókilderi, qaıtys bolǵan jaǵdaıda olardyń týystary qylmystyq isterdiń protsestik emes sıpattaǵy qujattarmen tanysýǵa, sondaı-aq iste saqtalǵan qoljazbalaryn, fotosýretterin jáne ózge de jeke qujattaryn nemese olardyń kóshirmelerin alýǵa quqyǵy bar.
Іshki ister organdarynyń arnaıy memlekettik muraǵatynyń memlekettik qyzmetter kórsetýi sheńberinde muraǵattyq anyqtamalar, qujattardan úzindiler, sondaı-aq qýǵyn-súrginge ushyraǵan adamdardyń qujattarynyń kóshirmeleri ótinish berýshige nemese olardyń senimdi adamdaryna beriledi.
