Qudyqqa túsip ketken Astana turǵyny ózin qutqarǵandardy izdeýde
ASTANA. QazAqparat - 13 jastaǵy oqýshy qaza tapqan mańaıda ashyq turǵan qudyqqa túsip ketken Astana turǵyny ony shyǵaryp alǵan adamdardy izdep jatyr, dep habarlaıdy QazAqparat.
Janara Qojabergenova aıaǵyn aýyrtyp alǵan, ol telefon arqyly bolǵan oqıǵa týraly aıtyp berdi.
«25 qarashada balammen birge ápkemniń úıine qonaqqa bara jattym. Kúndiz saǵat 2-ler shamasy edi, Aınakól kóshesi men Qordaı kósheleriniń qıylysynda joldan ótip bara jattym. Sol kúni kúrtik qar boldy, men ulymnyń qolyn jiberip, onyń kapıýshonynan ustap kele jattym. Ketip bara jatqanda men jerdiń astyna túsip kettim. Qatty shoshydym. Kómekke adamdardy shaqyra bastadym. Qasymnan kólikter ótip bara jatty, olar meni kórdi. Biraq, eshkim kómekke kelgen joq. Alystan meni balasymen birge kele jatqan áıel baıqap qalyp, júgirip keldi. Taǵy bir qyz kómektesti. Olar meni tartyp shyǵaryp aldy. Olarǵa alǵysymdy aıtyp, keıin 109 qyzmetine jiberý úshin sýretke túsirip aldym», - deıdi áıel.
Janara Qojabergenova qutqaryp qalǵandardy izdep jatyr. Ol óz nómirin áleýmettik jelige jarııalaǵan.
Onyń aıtýynsha, úsh ret «109» qyzmetine habarlasqan.
«Úıge kelip, «109» nómirine ashyq turǵan lıýk týraly habarladym. Olar adamdar jiberetinin aıtty. Men olardan qaı jerde ekenin kórsetý úshin maǵan baılanysýlaryn suradym. Biraq, olar qaıta habarlasqan joq. Taǵy da ózim habarlastym, maǵan qaıta baılanysatyndaryn taǵy da aıtty. 17.00-den keıin osy jolmen úıge kele jatyp, qudyqtyń betin qar jaýyp qalǵanyn baıqadym. Qudyqqa taǵy bireý túsip ketedi me dep ýaıymdadym. Úshinshi ret «109» nómirine osy máselemen habarlastym. Keshke polıtsııamen birge oqıǵa bolǵan jerge bardyq», - deıdi áıel.
Astana polıtsııa departamenti baspasóz qyzmetiniń habarlaýynsha, bul fakti Sotqa deıingi tergeýdiń biryńǵaı tirkelimine tirkelgen. QR QK 306-baby «Qaýipsizdik talaptaryna saı kelmeıtin jumystardy oryndaý ne qyzmetter kórsetý» boıynsha sotqa deıingi tergeý júrip jatyr. Qajetti saraptama taǵaıyndaldy.
