Qudyqqa qulaǵan astanalyq boıjetken aýrýhanada jatyr
ASTANA. QazAqparat – Elordada beti ashyq jatqan qudyqqa túsip ketken 25 jastaǵy boıjetken qazir aýrýhanada jatyr, dep habarlaıdy QazAqparat tilshisi.
Boıjetkenniń qazirgi hal-jaǵdaıyn Qoǵamdyq densaýlyq saqtaý basqarmasyna habarlasyp surap kórdik. Zardap shegýshi №2 qalalyq kópbeıindi aýrýhanaǵa jetkizilgen.
«Beıindi mamandar teksergennen keıin súıektiń jabyq túrdegi synýy anyqtaldy. Sol jaq ıyǵynyń súıegine hırýrgııalyq operatsııa júrgizildi. Qazir naýqas travmatologııa bóliminde. Jaǵdaıy turaqty. Tolyq kólemde em alyp jatyr», - degen habar aldyq baspasóz qyzmetinen.
Buǵan deıin elordada 25 jasar boıjetken beti ashyq jatqan qudyqqa túsip ketkeni týraly habarlaǵan edik.
Qalalyq TJD-nyń aqparatynsha, zardap shegýshige kómek kórsetý úshin qutqarýshylar men medıtsınalyq qyzmetkerleriniń qudyq ishine túsýine týra kelgen.
«Qutqarý arqany jáne baspaldaqtyń kómegimen jedel jáne kásibı is-qımyl nátıjesinde, sondaı-aq qutqarýshynyń súıemeldeýimen 1997 jyly týǵan qyz qudyqtan shyǵaryldy», - deıdi departamentten.
