Kýdrın Pýtın tórtinshi merzimge saılanýy múmkin ekenin aıtty
ASTANA. QazAqparat - Azamattyq bastamalar komıtetiniń basshysy, RF burynǵy qarjy mınıstri Alekseı Kýdrın prezıdent Vladımır Pýtın taǵy bir merzimge saılaný quqyǵyn paıdalanýy múmkin degen pikirin aıtty. Bul týraly ol Pýtınniń memleketti basqarǵanyna 15 jyl tolýyna arnalǵan dóńgelek ústeldiń sońynda jýrnalısterge suhbat bergen kezinde málim etti.
«Vladımır Vladımırovıch Pýtınde taǵy bir ret saılanýǵa konstıtýtsııalyq quqyǵy bar, - dep eske saldy Kýdrın. - Meniń oıymsha, ol bul quqyǵyn paıdalanady».
Osyǵan deıin Pýtın kelesi prezıdenttik saılaý týraly máseleni ótken jyldyń jeltoqsan aıynda bolǵan úlken baspasóz máslıhatynda qozǵaǵan bolatyn. «2018 jylǵy prezıdenttik saılaý týraly sheshim qabyldaýǵa áli erte. Memleket ıgiligi úshin jumys jasaý kerek. Jumys qorytyndysy boıynsha, kim saılaýǵa baratyny týraly sheshim qabyldaý qajet. RF azamattarynyń múddeleri úshin eńbektený kerek», - degen eken sol kezde Pýtın.
2014 jyldyń qarashasynyń sońynda TASS agenttigine bergen suhbatynda Pýtın 2018 jylǵy saılaýǵa qatysý múmkindigin joqqa shyǵarmady.
Ol, Konstıtýtsııa mundaı múmkindikti berip otyrǵanyn aıtty. Alaıda bul quqyqty paıdalana ma, joq pa ekenin áli bilmeıtinin jetkizdi.
