Qudiret Shámıev: taekvondo Qazaqstandaǵy bes úlken sporttyń biri

ASTANA.KAZINFORM — Qazaqstanda 75 myńǵa jýyq adam taekvondo sportymen aınalysady. 

Bul týraly Qazaqstan taekvondo federatsııasynyń prezıdenti Qudiret Shámıev Astanada ótken baspasóz maslıhatynda Kazinform tilshisine bergen jaýabynda aıtty.

— Qazirgi tańda, taekvondo elimizde bes mańyzdy sport túrine jatady. Statıstıkaǵa sáıkes, Qazaqstanda 75 myńǵa jýyq adam osy sportpen aınalyssa, onyń ishinde 45 myńǵa jýyq kásibı sportshy bar, — dedi Shámıev.

Federatsııa basshysynyń aıtýynsha, elimizde osy sportty damytý úshin birqatar naqty qadam jasalyp jatyr.

— Qazaqstanda taekvondony damytýǵa múddelimiz. Sebebi bul sport tánniń ǵana emes, jannyń da saýlyǵyn dáripteıdi. Elimizde osy sport túrin damytý úshin kóptegen shara atqaryp jatyrmyz. Onyń ishinde kıno jáne serıal túsirý, Qazaqstanǵa taekvondony alǵash alyp kelgen Mustafa Óztúrik jáne taekvondo tarıhy týraly kitaptar jazý sııaqty jumystar bar, — dedi ol.

Sóz sońynda, federatsııa basshysy álide kóp jumys atqarý kerek ekenin aıtyp, aldaǵy ýaqytta jaqsy nátıjege jetýge kósh salýǵa ýáde berdi.

Aıta keteıik, 14–16 tamyz aralyǵynda Jaqsylyq Úshkempirov atyndaǵy Jekpe-jek saraıynda eresekter, jasóspirimder jáne kadetter arasynda taekvondodan Kazakhstan Open 2025 (G-1) halyqaralyq reıtıngilik týrnıri ótedi.