Qudiret Shamıev Altaı taekvondo odaǵynyń prezıdenti bolyp taǵaıyndaldy
ASTANA. KAZINFORM – Ýsı qalasynda ótip jatqan Álem chempıonaty aıasynda jańa óńirlik uıym Altaic Taekwondo Union (AT) resmı túrde tanystyryldy.
Saltanatty sharaǵa Dúnıejúzilik taekvondo federatsııasynyń prezıdenti doktor Chýngvon Choý qatysyp, Altaı aımaǵyndaǵy mádenı jáne sporttyq baılanystardy nyǵaıtý úshin osyndaı qurylymdy qurýdyń mańyzdylyǵyn atap ótti.
Dúnıejúzilik taekvondo (World Taekwondo) federatsııasynyń prezıdenti doktor Choýdyń usynysymen Qazaqstan taekvondo (WT) federatsııasynyń prezıdenti Qudiret Shamıev Altaı taekvondo odaǵynyń tuńǵysh prezıdenti bolyp saılandy.
Sonymen qatar, qatysýshy ulttyq qaýymdastyqtar (MNA) kelesi chempıonatty qabyldaıtyn eldiń federatsııa prezıdenti odaq prezıdenti qyzmetin atqaratyn bolyp kelisti. Odaqtyń alǵashqy Bas Assambleıasynyń sheshimimen 2026 jyly ótetin alǵashqy Altaı taekvondo chempıonatynyń ıesi retinde Almaty qalasy tańdaldy.
Altaı taekvondo odaǵyn qurý týraly sheshim 2025 jylǵy tamyz aıynda Koreıanyń Mýdjý qalasynda ótken Dúnıejúzilik taekvondo Gran-prı Chellendji kezinde qabyldanǵan bolatyn. Odaq Altaı mádenı keńistigine jatatyn 10 eldi biriktiredi: Ázerbaıjan, Japonııa, Qazaqstan, Koreıa, Qyrǵyzstan, Mońǵolııa, Reseı, Túrkııa, Túrikmenstan jáne Ózbekstan.
Óz kezeginde Dúnıejúzilik taekvondo federatsııasynyń prezıdenti doktor Chýngvon Choý jańa bastamany tolyq qoldaıtynyn jetkizdi.
«Dúnıejúzilik taekvondo uıymy Altaı taekvondo odaǵynyń qurylýyn qoldaıdy. Bul odaq ulttyq qaýymdastyqtar arasyndaǵy mádenı jáne sporttyq yntymaqtastyqty damytýǵa sep bolady», – dedi doktor Choý. «Almaty alǵashqy Altaı chempıonatyn joǵary deńgeıde ótkizetinine senimdimiz. Prezıdent Shamıev pen 10 ulttyq qaýymdastyqpen birlesip, taekvondony Altaı aımaǵynda jańa deńgeıge kóteremiz», – dep qosty ol.
Óz sózinde prezıdent Qudiret Shamıev Qazaqstannyń Altaı taekvondo odaǵynyń damýyna belsendi úles qosatynyn atap ótti:
«Qazaqstan bul bastamany tolyq qoldaıdy jáne alǵashqy Altaı taekvondo chempıonatyn qabyldaýǵa qýanyshty. Altaı odaǵy bizdiń elder arasyndaǵy yntymaqtastyqty nyǵaıtyp, taekvondo arqyly birlik pen sheberlik qundylyqtaryn dáripteıdi», – dedi Shamıev.
Altaı taekvondo odaǵy turaqty túrde chempıonattar ótkizýmen qatar, bilim berý baǵdarlamalaryn ázirleýdi, jastardy sport arqyly damytýǵa jáne barlyq qatysýshylar úshin teń múmkindikterdi qamtamasyz etýge baǵyttalǵan bastamalardy júzege asyrady.
Bas Assambleıa barysynda uıymnyń resmı logotıpi bekitildi. Kelesi kezdesý 2026 jylǵy sáýirde Ózbekstannyń Tashkent qalasynda ótetin Dúnıejúzilik jasóspirimder taekvondo chempıonaty kezinde ótetini kelisildi.
Aıta keteıik, Qazaqstanda 2027 jyly taekvondodan álem chempıonaty ótedi.