Kúdiktini ustaýǵa qatysty zańnamaǵa túzetýler engiziledi
ASTANA. KAZINFORM – Endi ustalǵan azamattyń quqyqtary oǵan birneshe saǵattan keıin emes, dál ustalǵan sátinde aıtylýy tıis. Jańa Konstıtýtsııadaǵy ózgerister buǵan kepildik beredi. Bul jóninde Úkimet otyrysynda QR Ádilet mınıstri Erlan Sársembaev málimdedi.
Onyń sózinshe, ustalǵan adamdy quqyqtary týraly habardar etý qaǵıdatyn Konstıtýtsııa deńgeıinde bekitýdiń mańyzy zor. Bul qaǵıdat halyqaralyq tájirıbede «Mıranda erejesi» retinde belgili.
– Mundaı mindet Qylmystyq protsestik kodekste buǵan deıin de qamtylǵan. Alaıda quqyqtar dál ustalǵan sátte túsindirilmegen. Budan bylaı Konstıtýtsııaǵa saı, adamnyń quqyqtary birneshe saǵattan keıin emes, dál ustalǵan sátte aıtylýy tıis. Ony iske asyrý úshin salalyq zańnamadaǵy adamdy ustaý tártibin retteý jáne oǵan protsestik quqyqtaryn túsindirý normasyna túzetýler engizý qajet, - dedi mınıstr.
Buǵan deıin habarlaǵanymyzdaı, Úkimet otyrysynda jeke tulǵalardyń tólenbegen aıyppuldary tolyq nemese ishinara esepten shyǵarylatyny aıtyldy.