Kúdiktilerden aqsha bopsalaǵan: UQK polıtseılerge qatysty tergeý júrgizip jatyr
ALMATY. KAZINFORM — Almatyda quqyq qorǵaý organdary qyzmetkerleri kúdiktilerden aqsha bopsalady degen kúdikke ilindi.
Áleýmettik jelilerde Almatyda 8 polıtseı esirtkige táýeldilerden jáne esirtki kýrerlerin ustap, keıin olardy «túrmege qamaımyz» dep qorqytyp, únemi aqsha bopsalaǵany týraly aqparat tarady. Keıin tórt qyzmetker jumystan shyǵarylǵany aıtylady.
Jelidegi aqparatqa sáıkes, eks-polıtseıler 10 adamnan aqsha bopsalaǵan. Keıbireýi 500 000 teńge, al bireýler mıllıon teńgege deıin bergen.
Almaty qalalyq prokýratýrasy Kazinform tilshisine qylmystyq is tergelip jatqanyn rastady. Quqyq qorǵaý organdary qyzmetkerleriniń ústinen Qylmystyq kodekstiń 362-baby «Laýazymdyq ókilettikterin asyra paıdalaný» boıynsha is qozǵaldy.
Іsti Almaty qalasy boıynsha Ulttyq qaýipsizdik komıtetiniń tergeý bólimi tergep jatyr.
Eske salaıyq, Astana turǵynynan 17,6 mln teńge bopsalaǵan er adam 7 jylǵa sottalǵan edi.
