«Qudireti keremet keseneni qaıtsek álemge tanyta alamyz?» - respýblıkalyq basylymdarǵa sholý
ASTANA. Aqpannyń 9-y. /QazAqparat/ - Qazaq aqparat agenttigi respýblıkalyq basylymdarda aqpannyń 9-y, seısenbi kúni shyqqan ózekti materıaldarǵa sholýdy usynady.
EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaevtyń AQSh-qa sapary BUU-nyń Qaýipsizdik Keńesinde sóz sóıleýimen jáne osy álemdik uıymnyń Bas hatshysy Pan Gı Mýnmen kezdesýmen aıaqtaldy. Osy sapar jóninde egjeı-tegjeıli bilgińiz kelse, «Egemen Qazaqstan» basylymynyń búgingi sanyndaǵy «Sapar tabysty támamdaldy» taqyrybymen berilgen maqalaǵa nazar aýdaryńyz.
Osy taqyrypty arqaý etken maqalany «Aıqyn» jáne «Astana aqshamy» gezetteriniń búgingi sanynan da oqı alasyzdar.
«Qadiri bólek Kárekeń». Osy taqyryppen «Egemen Qazaqstan» gazetinde jaryq kórgen Qýanyshbaı Qurmanǵalıdyń maqalasy belgili jazýshy Káribaı Ahmetbekovtyń ómir jolyna arnalypty. «Aıaýly azamat, kórnekti jazýshy Káribaı Ahmetbekov edi. Onyń kóptegen kitaptary jaryq kórdi. Ol eńbekteriniń bárin tizbelep, jeke-jeke taldap jatýǵa bir maqala aıasynda múmkindik az bolǵandyqtan, men onyń tusaýkeser týyndysy "Syı oramal" men sońǵy jaryq kórgen shyǵarmasy "Qasiretke" ǵana toqtalyp ótpekshimin. Bul onyń jazýshylyq jolyn baǵamdap-baǵalaýǵa da ońtaıly tásil»,- deıdi jazýshy.
***
Taıaýda Aqtóbe qalasynyń ІІB qyzmetkerleri temir tordyń arjaǵynda otyryp-aq, bostandyqta júrgen turǵyndardan ońaı jolmen qomaqty aqsha bopsalap júrgen alaıaqtardyń qylmysyn áshkereledi. Oqıǵanyń mán-jáıin «Aıqyn» basylymynyń búgingi sanyndaǵy «Túrmeden soǵylǵan qońyraý» taqyrybymen berilgen maqaladan oqı alasyzdar.
«Qudireti keremet keseneni qaıtsek álemge tanyta alamyz?» Osyndaı saýalǵa qurylǵan «Aıqyn» gazetindegi kelesi maqala kıeli Túrkistan qalasynyń bolashaǵyna alańdaýshylyq bildiripti. «Úkimettiń týrıstik klasterdi damytý baǵdarlamasyn qabyldaǵanyna da biraz boldy. Aqtaý-sıtı, Balqash, Býrabaı, arnaıy aımaqtary qurylyp, Otyrar aýdany Arystanbab kesheni aýmaǵynda týrızmdi damytýǵa úkimetten qomaqty qarjy bóldirip jatqanda bizder qala bıýjetine qarjy túsirýdiń ornyna, týrısterdi Qoja Ahmet Iassaýı kesenesine tegin kirgizip otyrmyz. Mundaı jaǵdaıda bizdiń qalamyzda týrızmdi damytý baǵdarlamasy ne bolmaq?»- deıdi basylym.
On segiz myń ǵalam qupııa syrǵa toly. Onyń bárin «ashtyq, bildik» deýge ázirge adamzattyń quqy joq. ǵalam neǵurlym jumbaq bolǵan saıyn, onyń ishine úńilýge adamnyń qumary artary anyq. Dese de, ótkeni beımálim, biraq adamzat tarıhynda eleýli oryn alǵan, órkenıetke úles qosqan, tirshilik otyn qozdatqan aımaqtar, eldimekender jer betinde jetkilikti. Ol oryndar jaıly ańyzǵa bergisiz áńgimeler kóp. «Aıqyn» gazetiniń búgingi sanynda jaryq kórgen «Jer betinen joǵalǵan qalalar» atty maqala ańyzǵa aınalǵan shaharlar jaıynda sóz qozǵaıdy.
***
Astana qalasy ákiminiń turǵyndarmen esepti kezdesýinde qala bacshysy Imanǵalı Tasmaǵambetov saýal joldaǵan kóptiń ishinen úsh turǵyndy jeke qabyldaýǵa ýáde bergen bolatyn. Belgilengen kúni atalǵan azamattardyń kókeıkesti máselelerimen óz kabınetinde ońasha otyryp bólisti. Tolyǵyraq «Astana aqshamy» basylymynyń búgingi sanyndaǵy «Qala basshysy qabyldady» degen taqyryppen berilgen maqalaǵa nazar aýdaryńyz.
«Dana halqymyzdyń rýhanı-kórkemdik tájirıbesi, ulttyq tárbıesi, oı-sezim, sulýlyq dúnıesi qandaı deseńizshi! «Er ústinde uıyqtamasań, atqa minip neń bar. Halyq qamyn jeı almasań, datqa bolyp neń bar» deıtin abzaldyq qaǵıdasy, qasıetti dala lebizi sonaý Uly Otan soǵysy jyldarynda sańqyldap estildi»,- dep jazǵan «Astana aqshamy» gazetiniń búgingi sanyndaǵy kelesi maqala «Jeńip qaıtsań jaýyńdy, Atańnyń jaryq kúni - sen» degen taqyryppen Uly Jeńistyń 65 jyldyǵyna arnalypty.
Sondaı-aqosy basylymda jaryq kórgen «Jaqynyn jatqa qımas jurt emes pe ek?» atty maqala júreksizderdiń saýda kózine aınalyp bara jatqan jetimderdiń taǵdyryna nazar aýdarypty. «Jetim dese júregi eljiremeıtin qazaq joq. Esirkeıdi. Músirkeıdi. Jany ashıdy. Alaıda, qoǵamdyq turǵydan alǵanda jetimderge janashyrlyq tanytyp qoıa salý tym az. Ásirese, adam aılasy artyp, ártúrli jaman pıǵyldar iske asyrylyp jatqan myna zamanda jetimder máselesine qareketsiz qaraý - qaıyrymsyzdyq »,- deıdi basylym.
***
«Ázirshe qazaqtyń kóńilden shyǵatyndaı tarıhy jazylǵan joq»,- deıdi «Alash» tarıhı ǵylymı - zertteý ortalyǵynyń prezıdenti Haırolla Ǵabjálelov «Alash aınasy» gazetine bergen suhbatynda. Qazaq tarıhyn zertteýde tyń ádister men sony kózqarastarǵa ıe bolǵyńyz kelse, basylymnyń «Alash azamaty» aıdaryna nazar aýdaryńyz.
«Astyq pen daqyldardyń bıootyn óndiriletin kólemin kvotamen shekteý kerek pe?». Osy másele úshin Parlament Májilisiniń depýtattary atalmysh zań jobasyn úshinshi oqylymǵa qaldyryp otyr. «Alash aınasy» gazetinniń «Oı-kókpar» aıdarynda Parlament Májilisiniń depýtaty Ermuhanbek Omarov pen Parlamant Senatynyń depýtaty Serik Aqylbaı atalǵan taqyryp tóńireginde pikir talastyrypty.
«Osydan 79 jyl buryn aq qarly aqpanda aspanmen astasqan Hantáńiri shyńy shyr ete túsken sábı únimen jańǵyryp ketken-di. Elshen búırek eli ol kezde dúnıege erekshe jannyń kelgenin, keıin onyń Qarasazdy qalyń qazaq elin bylaı qoıǵanda, dóńgelegen dúnıege tanytatyn aqıyq aqyn bolatynyn qaıdan bilsin?!» Osylaı oı terbegen «Alash aınasy» gazetindegi kelesi maqala «Muqaǵalı mýzeıde emes, árbir júrekte «ómir súrýi» kerek!» degen taqyryppen qazaq poezııasynyń aqıyq aqyny Muqaǵalı Maqataev tóńireginde oı órbitedi.
